Shillong, Ïaïong 28
Ka Shillong Lajong Football Club ka la ïoh rung sha ka semi final jong ka lympung Shil-long Premier League (SPL) 2023 hadien ba ka la lah ban pynliem noh ïa ka Sawmer Sports Club ha ka jingïalehkai kaba la long ha ka sngi Saitjaiñ, ha SSA Stadium, First Ground, Polo.
Nalor ka Shillong Lajong FC, kiwei ki ar tylli ki club kiba la ïoh rung sha ka semi final ki long ka Rangdajied United FC, ka Mawlai Sports Club.
Ka Shillong Lajong FC haduh mynta na ki 6 sien ïakhun ka la kamai 12 point bad ka duna 1 point ïa ka Mawlai SC kaba don ha ka kyrdan kaba 2 ha ka SPL, katba ka Sawmer ka la neh hi tang da kaba kamai 3 point bad ka la duh ban rung sha ka semi-final.
Ha katei ka jingïalehkai, ka Shillong Lajong FC ka la lah ban pynliem noh ïa ka Sawmer SC da 4-0 kol. Tang mar ïa sdang ka jingïakhun ka Shillong Lajong lyngba u Deibormi Tongper ka la ïoh thep ïa ka kol ba nyngkong ha ka minit kaba 14. Kumta ha ka minit kaba 18 u Wadajied Kynsai Ryngkhlem u la thep ïa ka kol bad u la ïoh thep biang ïa ka kol ka ba-ar bad kaba lai jong ka Shillong Lajong ha ka minit kaba 77 bad u Gladdy Kharbuli u la thep ïa ka kol kaba saw ha ka minit kaba 24.
Ha ka sngi Nyngkong ka jingïakhun ha ka SPL kan long hapdeng ka Rangdajied United FC pyrshah ïa ka Langsning FC ha ka por 3:15 mynsngi.
Kumba long mynta ka Rangdajied ka don ha ka kyrdan kaba nyngkong bad ka la ïoh rung sha ka semi-final. Ka Langsning pat kan hap ban ïakhun tyngeh na ka bynta ban pynthikna ba kan dei ka kynhun kaba 4 ban ïoh rung sha ka semi-final.
