Shillong, Ïaïong 28
Ka jingthep ‘vote’ ha Meghalaya ha ki ar tylli ki parliamentary konstitwensi na ka bynta ka ilekshon sha Ïingdorbar Lok Sabha ka la dep hynrei ki kyndon pynïaid ilekshon ki dang pyrkhing ban pyntrei ïa ki projek kam pynroi khamtam kiba dang dei ban sdang thymmai.
Ka jingthep ‘vote’ ha Meghalaya ka la dep ha ka 19 tarik mynta u Ïaïong bad ki kam pynroi ki hap ban sahteng shwa tad haduh ban da dep lut ka ilekshon kata haduh ban da dep ñiew ‘vote’ ha ka 4 tarik u Jylliew.
Haba ïakren bad u Chief Electoral Officer (CEO), Dr. B.D.R Tiwari, u la ong ba ka ‘Model Code of Conduct (MCC)’ lane ka jingpyrkhing ilekshon ka dang treikam bad ym lah ban ïaid lait namar ka ilekshon ka dang ïaid bad ka jingthep ‘vote’ ruh ka dang bteng ha kiwei pat ki bynta jong ka ri.
U la ong ba ka kyndon ka kren shai ba ki projek kiba la sdang pyntrei hashwa ban pynbna ïa ka ilekshon kim don jingwit eiei hynrei ym lah ban sdang thymmai ïa kino-kino ki projek katba ym pat kut ka ilekshon.
Haba kylli halor ka jingpyllait pisa na ka bynta ki projek kiba la dep aiti ïa ka ‘work order’ bad la sdang ïa ka kam naduh shwa ka ilekshon, u CEO u la ong ba kino-kino ki kam kiba la ïaid lypa kim don jingeh ban pyllait pisa na ka bynta ban pyntyllun ïa ki kam shakhmat.
Kum ban shu kdew, ka jingpyntreikam ïa ka ‘Model Code of Conduct’ khamtam ka jingneh slem ka ilekshon haduh 2 bnai shiteng kan ktah bha ïa ki kam pynroi khamtam kito ki projek kiba la dei ban sdang pyntrei noh namar mynta ym pat lah leh eiei katba dang don ka ilekshon.
Ka Election Commission of India (ECI) kam khang eiei ban pyllait ïa ka pisa kum ka jingsiew na ka bynta ki kam/projek kiba la dep ban pyntrei wat lada ki kyndon pyrkhing ilekshon lane ‘Model Code of Conduct’ ki la treikam ha baroh kawei ka ri hadien ba la dep pynbna ban pynlong ïa ka ilekshon sha Ïingdorbar Lok Sabha.
Ka jingpyrkhing ïa ki kyndon ilekshon ka la treikam naduh ka 16 tarik u Lber kaba dei ruh ka sngi ba ka ECI ka la pynbna ïa ka ilekshon ha baroh kawei ka ri.
Ka ECI ka la phah shithi kum ka jingbthah sha baroh ki Jylla bad Union Territory haba ïadei bad ka jingpyllait pisa hapoh ki skhim MLA/MP.
Ka ECI ka la kren shai ba ym lah ban pyllait pisa thymmai hapoh ka skhim jong ki MP/MLA/MLC lada dang pyntrei ha kano-kano ka bynta jong ka ri katba dang ïaid ka ilekshon.
Shuh shuh ka ECI ka la ong haba ïadei bad ki kam kiba dei ban pyntrei, ym lah ban sdang wat lada la dep ban pyllait ‘work order’ hashwa ban treikam ka MCC khamtam lada ym pat sdang pyntrei teng. Ki jingpyntrei ki lah ban sdang ynda la dep ka ilekshon bad ki jingtrei kiba la dep sdang, kum kita ki kam ki lah ban bteng beit.
Nalor kata, ka ECI ka la ong ba ym don jingkhang ban pyllait pisa na ka bynta ki jingsiew kiba dei ïa ki kam kiba la dep pyntrei lada ka la don ka jinghun ïa ka rukom pyntrei.
Ka ECI ka la ong ruh ba ki skhim kiba la dep mynjur bad ka pisa ruh la mang ne la pyllait bad ki tiar ki tar ruh la dep thied ban pynpoi sha ki jaka pyntrei, kum ïa kita ki skhim lah ban pyntrei katkum ki prokram.
