Khliehriat, Ïaïong 28
Ka Seiñ Jait Tuber Hig-her Secondary School, Tuber Kmaishnong ka la rah ïa ka nam ‘Overall Champion’ ha ka lympung ïalehkai District Level Inter School Athletic Meet 2024 ba la pynïaid da ka ophis District Sports Officer (DSO), East Jaiñtia Hills District ryngkat ka jingïatreilang bad ka East Jaiñtia District Sports Association (EJDSA).
Ïa kane ka jingïaleh-kai la pynkut ha ka 27 tarik mynta u bnai ha madan Teilang Phawa, Dkhiah West bad la pynhap pyrda da u Principal jong ka Jaiñtia Eastern College u Dr. Phervision Nongtdu ha ka jingdonlang ka DSO ka Kong Stephanie M Rapsang, ki nongïalam bad dkhot EJHDA, ki riew rangbah ka thaiñ nalor kiwei kiwei.
Mynta u snem ki don haduh 887 ngut ki khynnah skul shynrang bad kynthei na ki 29 tylli ki skul jong ka District kiba ïashim bynta shitrhem ha ki jait jingïakop bapher bapher ba la bynta naduh ka kyrdan Under-14, Under-16 bad Under-18.
Ka Seiñ Jaitt Tuber Higher Secondary School Tuber Kmaishnong ka la ïoh rah ïa ka nam Overall Champion dei hadien ba ka la khur haduh 8 tylli ki takma ksiar, 4 tylli ki takma rupa bad 4 tylli ki takma rnong bad ka la ïoh khur ruh ïa ka nam Best Athletes jong ka kyrdan Under-16 Boys ba la mihkhmat da u Ribait Bang.
Ïa ka nam Best Team jong ka kyrdan Under-14 jong ki khynnah shynrang la rah da ka KB Memorial Secondary School kaba la khur 2 tylli ki takma ksiar, 2 tylli ki takma rupa bad artylli ki takma rnong. Katba na ka liang ki kynthei la rah da ka Tluh Secondary School kaba la khur 2 tylli ki takma ksiar bad artylli ki takma rupa.
Ïa ka nam Best Team ha ka kyrdan Under-16 ha ka liang jong ki shynrang la rah da ka Sein Jait Tuber Higher Secondary School, Tuberkmai Shnong kaba la khur 3 tylli ki takma ksiar, kawei ka rupa bad kawei ka rnong. Katba ha ka liang jong ki kynthei la rah da ka Sein Raij BR UP School, Mukhaialong kaba la khur 3 tylli ki takma ksiar, kawei ka takma rupa bad kawei ka rnong.
Ha ka kyrdan Under-18 ïa ka nam Best Team ha ka liang ki shynrang la rah da ka Seiñ Jait Tuber Higher Secondary School, Tuberkmai Shnong kaba la khur 3 tylli ki takma ksiar, kawei ka takma rupa bad kawei ka rnong. Katba ha ka liang ki kynthei la rah da ka Sham Sham Secondary School kaba la khur 4 tylli ki takma ksiar, 2 tylli ki takma rupa bad 5 tylli ki takma rnong.
Ïa ka nam ‘Best Athlete’ ha ka kyrdan Under-14 ha ka liang ki shynrang la ïoh da u Highbornson Muksor na Khliehriat Presbyterian H/S School da kaba khur 713 point, katba ha ka liang ki kynthei la ïoh da ka Preamble Bareh na Sacred Heart H/S School, Lamyrsiang kaba la ïoh 514 point.
Ha ka kyrdan Under-16 Boys la ïoh da u Ribait Bang na Sein Jait Tuber H/S School da kaba ïoh 615 point, katba na ka liang ki kynthei la ïoh da ka Diwakapaia Dkhar na Wapung H/S School, Wapung da kaba ïoh 572 point.
Ha ka kyrdan Under-18 Boys la ïoh da u Lastly Suchiang na Sutnga Presbyterian Higher Secondary School (683 point), katba na ka liang ki kynthei la ïoh da ka Samery Dkhar na Sham Sham Secondary School (503 point).
