Kolkata, ïaïong:
Ka seng Trinamool Congress ha ka Sngi Saitjaiñ ka la leit sha ka Election Commission (EC) ban pyrshah ïa ka Central Bureau of Investigation (CBI) bad ka National Security Guard (NSG).
Ka Mamata Banerjee kaba long ka nongïalam jong ka seng ka la pynshisha da kaba ong ba ka CBI ka la pynlong ïa ka jing-leit khynra ka bym don nongrim ha ki shnong ki bym don ei ei ha ka jylla ha ka sngi ba la pynlong ïa ka jingthep vote kata ha ka 26 tarik, Ïaïong.
“Ka jingmudui ka la long pyrshah ïa ka kynhun CBI halor ka jingleit khynra ha ki shnong ha Sandeshkhali, kaba don ha West Bengal, ha ka sngi ba la pynlong ïa ka jingthep vote, kane ka long shi bynta ka jingpynjah burok bad pynthoh bria ïa ka All India Trinamool Congress (AITC) ha ka sngi thep vote jong ka ilekshon Lok Sabha, 2024,” la ong ka jingmudui.
Ka kynhun Central Bureau of Investigation (CBI) ha ka sngi Thohdieng ka la pynlong ïa ka jingleit khynra ha ki ar tylli ki jaka kiba don ha Sandeshkhali jong ka jylla West Bengal ha kaba ka la ïoh ban kurup ïa kiba bun ki tiar siat bad ki kuli ha kaba ïadei bad ka jingtoh-kit halor ka jingjia jong ka jingshah thombor ka kynhun Enforcement Directorate (ED) ha u paidbhur da ka jingïalam bad jingpynshit jong u nongïalam ka Trinamool Congress u Shahjahan Sheikh ha ka 5 tarik, Kyllalyngkot, la ïathuh ki heh ba dei khmih halor kane ka bynta.
Ha ka por ba la don ka jingleit khynra ïa ki tiar siat kiba kynthup ki suloi ba la shna ha bar ri, kawei ka suloi ki nong India, kawei ka Colt Official Police Revolver, kawei ka suloi ba la shna shabar ri, kawei ka pistol shna hi, 120 tylli ki kuli ka 9mm, 50 tyllli ki kuli jong ka .45 calibre, 120 tylli ki kuli jong ka 9mm bad kiwei pat, la ïoh ban kurup.
Ki kynhun wadbniah, ki la ong ba ka la don ka jingleit khynra ba la pynlong da ki san tylli ki kynhun ha ryngkat ka jingkyrshan jong ki pulit ka thaiñ bad ki shipai ka sorkar kmie ha Sandeshkhali jong ka North 24 Parganas distrik.
Ki la ïathuh ba ka jingïoh khubor halor kane ka jingjia jong ka jingdon kiba bun ki tiar siat ka la long hadien ba la ïoh jingtip shaphang ka jingdon jong kiba thmu khaïi ïa kine ki tiar siat, bad pynbthei da ki katto katne ki briew kiba la shah suba.
“Ngi la ïoh ban kurup ïa 12 tyli ki tiar siat, kynthup ki pistol bar ri, ha ka por ba la don ka jingleit khynra,” la ïathuh u heh pulit u bym shym kwah ban pynpaw kyrteng.
Ha ka 5 tarik, Kyllalyngkot, ka kynhun ED ka la shah thombor ha Sandeshkhali ha kaba ka la leit ban pynlong ïa ka jingkhynra ha ki ïing bad ki jaka treikam jong u Shahjahan ha kaba ïadei bad ka jingdon jong ka jingjia halor ka kam bamsap.
Ïa kane ka jingshah thombor la tohkit da ka kynhun CBI kumba la hukum da ka Calcutta High Court.
“Ha ka por ba la pynlong ïa ka jingtohkit, la ïoh jingtip ba ki tiar ba la jah jong ka kynhun ED bad kiwei pat ki tiar la buhrieh ha ka jaka sah jong u nongïarap jong u Shahjahan at Sandeshkhali. Ha kaba ïadei bad kane, ka kynhun CBI ha ryngkat ki Central Reserve Police Force (CRPF) ki la leit ban khynra ha ki ar tylli ki jaka sah jong u “, la ïathuh u nongaiktien jong ka kynhun CBI.
Ha ka por ba la pynlong ïa ka jingkhynra, ïa kine kiba bun ki tiar siat la ïoh ban kurup. Ki katto katne kiwei patki tiar ba la ïoh ban kurup ki dei ki bom shna hi ha kaba ïa kine la aiti sha ka kynhun NSG ban pynduhbor ïa ki,” la bynrap u nongaiktien.
U la ong ba ka jingleit khynra kan sa ïai bteng. U Shahjahan u la shahkem ha ki pulit jong ka West Bengal ha ka 29 tarik, Rymphang ha kaba ïadei bad ka jingshah kynnoh donkti ha ka ban thombor pyrshah ïa ki heh ka kynhun ha ryngkat kumba 1000 ngut ki briew, ha kaba ki la don lai ngut ki heh ka kynhun ED kiba la mynsaw.
