Shillong, Ïaïong 28
Ka Meghalaya kum ka Jylla ka la ïoh nyngkong ban pynlong ïa ka ilekshon naduh ka ilekshon MP ha u snem 1977, ki ar tylli ki ilekshon ha u snem 1998 bad 2024 ki dei kiba paidbah ka Shillong Parliamentary konstitwensi ki mih bha ban leit thep ‘vote’.
Katkum ka jinglum jingtip halor ka jingwan ki paidbah ban leit thep ‘vote’ ha ki ilekshon MP bapher bapher ha Shillong konstitwensi, la lap ba bun ki ilekshon MP naduh u snem 1977 ter ter ki dei kiba duna bha ki paidbah kiba leit thep ‘vote’, ym tip na kano ka daw ki shim sting ban pyndep ïa ka kamram jong ki kum ki nongshong shnong.
Ha ka ilekshon Lok Sabha 1977 kaba dei ruh ka ilekshon MP kaba nyngkong eh kum ka Jylla, ka jingpoi thep ‘vote’ ki paidbah ka Shillong konstitwensi ka duna bha kata tang 55.61%. Ka jingdon ki nongthep ‘vote’ tang jong ka Shillong Parliamentary konstitwensi ha u snem 1977 ka long tang 1,90,149 ngut.
U MP banyngkong sha ka Ïingdorbar Lok Sabha na Shillong parliamentary konstitwensi u dei u Bah Hopingstone Lyngdoh (ba la khlad noh) uba la shahjied ha u snem 1977 kum u kyrtong ka Hill State People’s Democratic Party (HSPDP).
Napdeng kiba bun tylli ki ilekshon MP na Shillong parliamentary konstitwensi, ka jingleit thep ‘vote’ ka duna bha hynrei kaba duna eh ki nongleit thep ‘vote’ ha ka ilekshon MP na Shillong parliamentary konstitwensi ka dei ha u snem 2004 ha kaba kiba leit thep ‘vote’ ki long tang 46.90%.
Napdeng ki ilekshon kiba bun bha ki paidbah ki leit thep ‘vote’ ha Shillong Parliamentary konstitwensi ka dei ha ka ilekshon MP ha u snem 1998 bad mynta u snem 2024.
Ha ka ilekshon MP ha u snem 1998, ka jingpoi ki nongthep vote ha Shillong Parliamentary konstitwensi ka long 73.73% bad lehse ka dei kaba kham shongshit ha kaba ki paidbah ruh ki kham ïashimbynta bha kumba long ka ilekshon MP mynta u snem 2024.
Ka jingpoi thep ‘vote’ ki paidbah ka Shillong konstitwensi ha u snem 1998 kam da ïapher than bad ka jingpoi thep ‘vote’ ki paidbah mynta u snem 2024 kaba long 73.78%. Ki ilekshon MP ha kiwei pat ki snem na Shillong Parliamentary konstitwensi, ki pyni ba ka jingpoi thep ‘vote’ ki paidbah ka long hapdeng 50% bad 65% bad ka shu tam ne duna khyndiat ïa kane.
