Shillong, Ïaïong 28
U nongaibuit barim ka UDP, Bah Bindo M Lanong bad uba dei ruh u MDC ba shu sieh jong ka sorkar jylla sha ka Khasi Hills Autonomous District Council (KHADC) u la ong ba ka UDP ka ju ai tiket beit ïa ki briew kiba dei nabar ka UDP bad dei na kane ka daw ba ka seng kam khlaiñ bor.
U la ong ba ka UDP ka ai tiket ïa u Bah Lambor Malngiang na Nongkrem constituency ha ka ilekshon MLA ha u snem 2023 da kaba pynduh tiket ïa u kum u nongseng jong ka UDP. Hynrei, ynda mynta haba u la rem, u la mih bad leit ban kyrshan ïa ka kyrtong ka NPP ha kane ka ilekshon MP Lok Sabha.
“Haba u Bah Lambor um dei u dkhot ka UDP um sngewthuh ïa ka jingkordor jong ka seng, na kata ka daw haba u la rem mynta u la mih”u la ong biang.
Nalor nangta, u la ong haba ka ilekshon MLA ka la kut u la thoh shithi sha ka UDP ban ïa klet noh ïa kiba la dep bad u la pan tiket ïa ka ilekshon MP Lok Sabha, hynrei khlem ïoh jubab haduh u bnai Nailar 2023 bad kumta u la kynrandien noh.
U la ong biang ba kyndit-kyndit ba ka UDP ka la ai tiket ïa u Bah Robertjune Kharjahrin; u briew u bym pat don ha ka seng hynrei um tip la u Bah Robertjune un dang bteng ban don ha ka UDP ne un mih noh kumba phet u Bah Lambor. Un sa peit ïa ka por ban wan.
U la pyntip ruh ba ha ka jingwad jingtip, u Bah Robertjune un wan ba saw namar ka jingïakhun mynta ha ka ilekshon MP ka long hapdeng ka NPP, Congress bad VPP.
Ha kajuh ka por u la pyntip ha kine ki bnai ban wan un sa pynpaw pyrthei noh sha kano-kano ka seng kaba un sa leit ban pynïasoh namar mynta u la long uba laitluid.
Shuh shuh u la pynkynmaw hadien ba ka ilekshon MLA ka la kut haba u mut ban leit ai jingkyrshan ïa u Bah Pynïaid u la kyndit ban ïohi ba u la dep don lypa u Bah Lambor Malngiang hynrei ïa kita baroh u la klet noh.
U Bah Bindo u la pynshai ruh ba ka jingleit ai jingkyrshan ïa u Bah Pynïaid namar u sngewieid haba ka kmie bad u kpa jong u ki dei ki nongkyrshan ba radbah jong u ha ka por ba u dang ïakhun ïa ka ilekshon MLA na Nongthymmai constituency ha ki por ba mynshwa.
