Nongstoiñ, Ïaïong 29
Ka jingjia ki jingïatyngkhuh kali ha ka surok Nongstoiñ-Nongsohpian ha West Khasi Hills ka la jia na kawei ka taïew sha kawei pat, wat la ka la don tang ki jingjulor jong ki kali bad ka jingmynsaw malu-mala ha kaba kane ka la buh jingma ruh wat ïa ka ïaid ka ïeng jong ki paidbah.
Haba twad jingmut halor katei ka jingïai mih ki jingïatyngkhuh kali kiba sdang ban jia khah-khah ha kane ka surok, kaba long kawei na ki surok ka ban rung sha sor Nongstoiñ, kaba dei ka nongbah jong ka District, la ong ba ka daw ka lah ban dei lehse kawei na ka jingkhim jong ka surok bad kawei pat ka lah ban dei tang namar ka jingbym ïa burom markylliang hapdeng ki para nongñiah kali.
U Bah Sirian Wahlang, Sordar ka Shnong Nongsohpian haba kren halor kane ka phang u la ong, katkum ka jinglap jong u kum uwei na ki nongïalam shnong kaba kane ka surok ka ïaid lyngba na ka shnong, ka jingsdang jia kaba khah-khah jong ka jingïatyngkhuh kali ka long shisha kaba jingbuh jingma ïa ka ïaid ka ïeng jong ki paidbah, kumjuh ruh wat ïa ki khynnah skul kiba ïaid ba ïeng lyngba kane ka surok.
Shuh shuh na ka liang jong une u nongïalam shnong halor kane ka bynta u la ong, ka la donkam ïa ka sorkar lyngba ka tnat PWD ba kan hap ban pyrkhat thymmai biang ïa kane ka surok khamtam kumno ban ai noh da ka surok kaba kham heh khamtam ba kane ka surok ka long kaba donkam haduh katta katta namar kawei ka dei ka surok ka ban rung shapoh ka nongbah jong ka District.
U Bah Sirian u la ong ruh ba ka shnong ha kajuh ka por ka kyntu ïa baroh ki nongñiah kali kiba ïaid lyngba kane ka surok ba ki dei ban don ïa ka mynsiem ban ïa burom markylliang haba ki ïaid na kane ka surok khnang ba kan nym buh jingma ïa ka ïaid ka ïeng jong ki paidbah bad lehse yn lait na ki jingjia ïatyngkhuh kali ba khah-khah.
