D. H. Kharkongor
ñiuma, u bnai ïaïong u dei u bnai jong ka jingshit bad ka jingrang jingrkhiang hynrei ym kynmaw koit ba yn shit, yn lhop bad yn tyrkhong ruh de haduh katne katne. Lehse kaba palat liam ban ïa kane ngin jin da ïa mad, ha kine ki ar ki taiew kiba dang shu dep, lymda dei na ka jingdon ka jong kane ka lyer. Ka lyer kaba la paswut mynta la jan artaiew. Ka lyer kaba la nang khmih lynti ba kan paswut ha u bnai Lber pynban ka wan paswut khyllah tad ynda mynta u bnai ïaïong. Ka lyer kaba nangïai pyntyrkhong pynban ha ka jaka ba kan wan lam ïa u slap Pyrem, u ban ïarap pyntngeng ïa ka meimariang. U ïaïong une sa ba un kut noh hynrei ka jingkhie lyer kane la kumba kam pat treh ban keiñ noh. Ka Lyer kaba kum ba une u dei pynban u bnai ‘Lber’. Ka lyer kaba imat kumba ka beh pynban sha jngai bah ïa u slap Pyrem, u ban ïarap pyntngeng ïa ka meimariang.
La katta ngin ïaiap kyrmen ïa u slap Pyrem. U slap u ban pyntngen ïa ka meima-riang bad ïa baroh kiei kiei kiba la khreh ban khie lung. U slap Pyrem u ban pyn-tngeng naduh ïa ki sim ki doh, ki mrad ki mreng tad haduh ïa u khunbynriew. U slap Pyrem, uba pateng la pateng tad ynda kan wan ka lyiur, khang ba ngin nym mad ïa ka jingtyrkhong um kaba shyrkhei. Ngin ïa kyrmen ruh de ba kane ka lyer kan jai jai noh khang ba ngin lait ruh de na kano kano ka jingpluh ding ba shyrkhei. La katta ngin nym kyrmen pat de ïa ka ‘eriong ka ‘erngit lymne ïa u lap bah lapsan uba lem bad u phria, kiba kat ba kin pynjulor pynban la ïa ki jingthung ki jingtep kiba la khreh khie lung ne ïa ki jingdon ki jingem ki jong u khunbynriew. Nga kyrmen ïa u slap pyntneng naduh hynnin ka janmied, nga kyrmen ba un hap ruh de mynta ka sngi. U slap shipor uba tang kat ban shu tngen ka meimariang.
Wat lada ngam tip hok lada kane ka jinglong ka jingman jong ka suiñbneng ka dei shisha ne em kata ka ‘Heat Wave’ pynban nga kubur bad ka Sorkar ba kan bha ïa baroh ki jaka pule ba kin sangeh shwa shipor ïa baroh ki jinglehkmen lehsngewbha ne ki ‘tamsa’ ki jong ki, kiba shabar bad mynsngi mynshai. Kata, katba ka dang eh ne ka dang khlaiñ than eh ka sngi. Kaba katno tam ïa ki jaka pule kiba don ha ki jaka them jong ka Ri Lum Garo, khlem da klet ruh ïa kiba don ha ka thaiñ Ri Bhoi. Ym lah khlem da ïaroh ruh de ïa ka jingai jingmut ka jong u Director ka School Education & Literacy, kaba ïadei bad ka jingphikir ne ka jingïada ne kaba kum kane ka jinglong jong ka suiñbneng. Ka jingai jingmut ba ki khynnah pule ki dei ban kynmaw ban da dih um pateng la pateng khnang ba ka met jong ki kan nym tyrkhong um. Ka jingkynto ba ki khynnah pule ki dei ban kiar na ka jingshah ka jong ki ïa ka sngi khamtam hapdeng ka porshiteng sngi bad ka 3 baje noh phaisngi. Ka jingkyntu ba wei ba ki don shabar ki dei ban da kup bha ruh ia la ka jong ka shynrong khlieh ka jong ki da ki tupia da sngi lane da ki shatri.
Ha kat kane ka jingshit kyrang bad ka jingrang tyrkhong jong ka suiñbneng, kaba uba bun um lah khlem da angnud ïa u slap Pyrem, ba kita kiwei pat te ki ïa khuslaijingmut pynban ïa kata ka ‘Silent Votes’. Ym lah namar kata khlem da rymmuiñ weibriew ïa ka UDP kaba ynda kumne mynta ka poi ban pynshong nongrim pynban, ïa la ka jingkyrmen ka jong ka, sa ha ki ‘silent votes’. Ki ‘Silent votes’ kiba haduh 80%, kata, kat kum ka jingkheiñ ka diah jong ka. Kaba ngeit skhem ba kita kiwei pat ki dei ki ‘Loud Votes’ bad kiba don namar kata tang 20 %. Kaba sngewmat kumba ka ngeit bad ka kyrmen skhem ba kiba kham bun na kita ki ‘Silent Votes’ kin dei beit thik tang ki jong ka bad ym jong kata kawei pat ka para dkhot jong ka MDA. Kaba ha ka jingsngew kut lad ka kum pyrkhat ba ka VPP lei te kan nym ioh wat tang kawei ruh ka ‘Silent vote.’Kaba kum kletnoh wat ïa ka INC hi ruh. Te mano ban lah khlem da rymmuiñ wei ba ynda kumne mynta ka jingkyrmen ka jong ka UDP , ban jop ïa kane ka Lok Sabha Election -2024, ka dei beit thik sa tang ha kita ki ‘silent votes’.
ñiuma, ym lah ban len ba ki ‘Silent Votes’ ki don ïa ka bor ban rai ïa ka jingjop ka jong uno uno u kyrtong. Ki ‘Silent Votes’ ki don pat ruh ïa ka bor ba kin rai wat ïa ka jingrem ka jong uno uno u kyrtong. Ki ‘Silent votes’ ki don, namar kata, ïa ka juh ka dor bad ïa ka juh ka bor kumba long lem ki ‘Silent Votes’. Te to ngin ïa ap shitom, ïa ka 04/06/2024, ban sakhi lada ka dei shisha ne em ba ïa ka jingjop, ha kane ka Lok Sabha Election – 2024, yn rai da kita ki ‘Silent votes’ bad ym da ki ‘Loud votes’, kumba kam uta u Ex MLA uba dei ruh u Working President jong ka UDP. Ngin ap ba un pynshisha, ha ka 04/06/2024, ba ym dei ki ‘Loud Votes’ lane u paid uba shongshit, ha man la ki dong ki kyntoit ne ha man la ki surok, uba don ruh tang kumba 10% -20%, u ban rai ïa ka jingjop ka jong uno uno u kyrtong. Uba lehse u thew ïa u ‘Loud Voters’ jong ka VPP.
