Shillong, Ïaïong 29
Ka jingïalang na ka bynta ban ïakren halor ka mat kaba ïadei bad ka jingdon jong ki briew ba shong ba sah be-aiñ ha Lum Survey kan long lashai ka sngi ka 30 tarik hapdeng u Deputy Commissioner (DC) ka East Khasi Hills bad ki bor ba dei peit ka Shillong Cantonment Board (SCB).
Ïa kane la pyntip da u Bah Roykupar Synrem uba dei u President ka Hynñiewtrep Youths’ Council (HYC) ha ka Lah Sngi U Blei hadien ka jingïalang bad u Symbud Myntri Rangbah ka jylla u Bah Prestone Tynsong uba khmih ruh ïa ka tnat Kam Pohïing.
“Ha kane ka jingïalang na ka liang u Symbud Myntri Rangbah u la bthah ïa u DC ka East Khasi Hills ba un khot jingïalang ïa ka Cantonment Board, ïa ki pulit bad ïa kiwei kiwei ki tnat. U DC u la pyntip sha ngi ka seng ba u la dep ban buh ka jingïalang lashai ka sngi ban ïakren halor kane ka kam,” la ong u Bah Roykupar.
Haba aiti ïa ka dorkhas sha u Bah Prestone ba un tuklar lem halor kane ka kam, u Bah Roykular u la ong, “Ngi dawa ba ki bor ba dei khmih hapoh ka Sorkar Jylla ba kan leh eiei mardor ha kaban kyndang ïa kine ki nongshong be-aiñ bad ban pynpra ruh ïa ki ïing kham kloi katba lah”.
Une u nongïalam ka HYC u la ong, “Ka seng halor kane ka jinglap, ka la dep ban aiti da ka jingthoh bad buh ka jingdawa, te kaei ka lynti kaba na ka liang jong ka sorkar kan shim, ngin ap shwa katto-katne por ba kine ki briew ki dei ban mih na kane ka jaka. Hynrei lada ka sorkar ne kino-kino ki bor kim shim ïa ka jingkitkhlieh ban pynmih ïa kine ki briew, na ka liang ka seng, ngi long kiba la kloi ban shim ka jingkitkhlieh ha lade ha kaba lada donkam wat da lade ban leit ban weng ïa kine ki briew, ngin sa leh ïa kata, bad mynta ngin ap shwa ïa ka jubab ban ïoh na ka Cantonment bad ka sorkar kaei kaba kin leh.”
U la ong ruh ba ha ka jingleit jurip jong ka seng ha kane ka taïew ba la dep, la lap ba kane ka jaka ka la long kum ka ktem jong ki kam sniew bad kaba lah ban buh jingma shi katdei eh ïa ki nongleit nongwan na kane ka bynta.
“Ha ka jingjurip, ngi la shem ba kumba 80-100 tylli ki longïing ki la sah ha kane ka jaka da kaba shna ïa ki ïing ba la pyndonkam da ki plastik bad ki tiar lyngkhot- lyngkhai bad ha ka jingtohkit, la shem ba kine ki briew ki la sah be-aiñ khlem da ïoh jingbit na ka Cantonment Board, Shillong Municipal Board lane kino-kino ki bor ba dei khmih,” u la ong.
