Shillong, Ïaïong 29
Ka Jaiñtia National Council (JNC) ha ka Lah Sngi U Blei ka la dawa na ka Sorkar Jylla ba ka dei ban weng noh mardor ïa ka khyrdop ki shipai Border Security Force (BSF) ne ka Check-post na ka shnong Sonapyrdi ha East Jaiñtia Hills.
Ka JNC ka la pynpaw ïa kane ka jingdawa ha ka jingïakynduh ïa u Symbud Myntri Rangbah ka Jylla u Bah Prestone Tynsong bad ha ka dorkhas ba la aiti ha u, ka JNC ka la dawa ruh ba ka sorkar ka dei ban pynkhlaiñ ïa ka Anti-Infiltration Check Gate ha East Jaiñtia Hills District.
Kane ka jingdawa jong ka seng ban pynkynriah ïa ki shipai BSF na Sonapyrdi ka long hadien ba ki la mih ki jingjia bapher-bapher bad ki jingshah pyndik ba laiphew jait jong ki paidbah nongshong shnong ha ki shipai BSF.
“Ngi dawa ïa ka Sorkar ban pynkynriah lut sha khappud ïa ki khyrdop jong ki shipai BSF kiba don ha Sonapyrdi, Umbluh, Dona kaba ki shipai ki ju pynlong ïa ka jingtalasi kali man la ka sngi,” la ong u President ka JNC Bah Sambormi Lyngdoh haba kren sha ki lad pathai khubor.
U Bah Sambormi u la ong, ka jingdon ki BSF ha katei ka jaka ka long pynban ka jingpynthut ïa ka ïaid ka ïeng ki nongshong shnong, namar lada ki briew ki wan ïew kum na Khliehriat lane na Lum Shnong, ki ju shah pyndik ha kine ki BSF.
U la ong ruh ba ka jingbuh ïa ki BSF ha Sonapyrdi ka dei ka bym don jingmut satia namar ka East Jaiñtia Hills kam dei ka jaka ba bun ki lehnoh hynrei ka dei ka thaiñ kaba shongsuk-shongsaiñ.
“Ka seng ka kwah bad ka kyntu ïa ka Sorkar Jylla ban kan phah ïa ki BSF sha khappud ban pynkhlaiñ talasi ïa ki poi wir kiba wan na Bangladesh khamtam mynta ba la treikam ka CAA bad ha kajuh ka por ban ïada ïa u pud u sam ka Jylla bad ka Ri,” u la ong.
Shuh shuh u Bah Sambormi u la ïathuh ba ka jingdawa na ka Sorkar ban pynkhlaiñ ïa ka Anti-Infiltration Check Gate ha East Jaiñtia Hills ka long namar ka jinglaitlan ha khyrdop talasi mynder (Entry-Exit Point) kaba don ha Ratacherra.
“Ngi la ïakren bad u Symbud Myntri Rangbah ban pynkhlaiñ ïa ka jingtalasi ha ki Entry-Exit Point ha East Jaiñtia Hills khnang ban khanglad ïa ka jingrung tuh jong ki mynder ri ha ka por mynmiet,” u la ong.
