Agartala, ïaïong:
Kum shi bynta ban ai jubab halor ka jingïai bteng jong ka jingjur ka jingshit kaba la ktah jur ha Tripura, ka sorkar jylla ka la rai ban bteng ha ka ban khang ïa ki skul jong baroh ar, kata jong ka sorkar bad jong ki riewshimet sa kumba lai sngi.
Na ka daw jong ka jingjur palat jong ka sngi, ka tnat ba dei khmih ïa ka pule-puthi, ka la ong ba na ka daw jong ka jingjur palat jong ka jingshit la rai ban ai shuti ïa kine ki skul ha kaba la nang pynjlan shuh shuh ïa ka shuti na ka 29 tarik, Ïaïong haduh ka 1 tarik, May, 2024.
Ka sorkar Tripura ka la ai shuti ïa baroh ki skul naduh ka sngi Balang jong ka taïew ba la lah kum shi bynta ban ai jingïada ïa ki khynnah skul na kino kino ki jingshah ktah na kane ka jingshit palat jong ka sngi.
Baroh ki District Education Officer ki la shah bthah ba ki la dei ban pynbna halor kane ka rai sha man ki skul kiba don ha ka ki thaiñ kiba dei khmih, la ong ka hukum.
Ka hukum jong ka Education Department ka dei kaba la pynmih ym slem hadien ba la phah jingthoh ka Revenue Department kaba la bthah da kaba ong ba ka Tripura ka la shah ktah na ka jingjur palat jong ka jingshit naduh ki taïew ba la lah bad katkum ka jingïathuh jong ka Indian Meteorological Department (IMD), la ong ba kane ka jingshit kan sa ïai bteng ha kine ki sngi ban sa wan.
Baroh ki bor ba dei khmih hapoh ka distrik ki la shah bthah ba ki la dei ban pynlong ïa kiba bun ki jingïalap paidbah ba kin tip shaphang ka jingjur jong ka jingshit bad ki jingma kiba ap na ka bad wanrah ruh ïa ki kyndon ba bun ha kaba ïadei bad ka jingpynbiang ïa ka umbam-umdih bad ban khmih bniah halor ka jinglong jong ka suiñbneng khnang ban lait na kino kino ki jingshah ktah na ka jingshit palat jong ka sngi.
Kumba la sakhi, la ong ba ha ka sngi U Blei ka jingshit ha ka jylla ka la long da 37.6 Degrees Celsius, ha kaba ka la shah ktah ruh na ka jingshit bad ka jingthut jong ka suiñbeng, kaba la wan ha ryngkat u slap uba jur, ka lei-lieh, ka jingtied pyrthat bad ka lyer kaba jur.
Ha kaba ïadei bad ka jingjur jong u slap ki la don kumba 12 tylli ki ïing kiba la shah pynjulor lut bad 176 tylli kiwei pat ki la shah pynjulor malu-mala ha Kailashahar.
Ki la don kumba 49 tylli kiba la shah pynjulor khyndiat na ki bynta jong ka ïing bad saw tylli kiba la shah pynjulor bun, kane ka la long ha ka shnong Kumarghat kaba don ha Unakoti distrik.
