Nongpoh, Ïaïong 29
Ka Patharkhmah SC ka la rah ïa ka nam lahduh hadien ba pynliem ïa ka Umlakro SC da 1-0 kol ha ka jingïakhun phainal jong ka lympung ïalehkai jong Western Ri Bhoi League 2024 ba la pynlong da ka Western Ri Bhoi Sports Association (WRBSA) ha madan jong ka Western Ri Bhoi kaba ha Umsaw, Patharkhmah.
Ha kane ka sngi la wan ban sakhi ïa kane ka jing -ïakhun phainal da u Bah Hamletson Dohling, Pre-sident jong ka Meghalaya Football Association (MFA) kum u kongsan, u Bah Victor Rani, MDC ka Jirang konstitwensi kum u symbud kongsan bad u Bah Ripolas Nongtri, uwei na ki samla uba noh syn-ñiang shibun ha ka imlang ka sahlang jong ka thaiñ kum u nongshah kot sngewbha kyrpang nalor ki nongïalam ka WRBSA ba kynthup ïa u Bah Active Pator, President, u Bah Ephnas Thangkhiew, Secretary kiba la shim khia met bad mynsiem ban pynlong ïa kane ka lympung ïalehkai phutbol wat hapdeng shibun ki jingeh.
Haba phai khyndiat sha ka jingïalehkai ha kane ka sngi, ka jingïakhun hapdeng kitei ki ar tylli ki kynhun ka long kaba ïakhaid bha ha kaba ym shym la don satia kiba lah ban thep kol ha ka kylla step bad kut noh ha ka jingïakhaid.
Ryngkat bad ki spah ngut ki paidbah nongpeit kai kiba la wan ban kyrshan ïa la ki kynhun, ka jingïakhun ha ka kylla miet ka la nang kham shongshit shuh shuh haba baroh ar tylli ki kynhun ki la ïakhun tyngeh bad ïaleh ban ïoh pynkhih ïa ka jar. Dei tad haduh ka minit kaba 75 jong ka kylla miet ba ka kynhun jong ka Patharkhmah SC ka la ïoh ban pynkhih ïa ka kol lyngba u Fashioning Syngkli bad na ka liang ka kynhun jong ka Umlakro SC kam shym la lah ban pynphai kylla.
Kum ka lahduh, ka Patharkhmah SC ka ïohpdiang ïa ka song pisa kaba T. 50 hajar ryngkat ka trophy bad kan ïoh ruh ban mihkhmat ïa ka WRSBA sha ka Meghalaya State League ka ban sa pynlong ha kine ki khyndiat taiew ki ban sa wan, katba ka Umlakro SC ka ïohpdiang ïa ka song pisa kaba T. 30 hajar ryngkat ka trophy. Ha kane ka sngi la sam ruh ïa ki khusnam shimet kum shi bynta ban pynshlur bad ai mynsiem ïa ki nongïalehkai.
Haba ai jingkren ha kane ka sngi, u Bah Hamletson Dohling u la ai khublei bad jingïaroh kyrpang ïa ka WRSBA kaba la shimkhia ban pynlong ïa kane ka lympung ïalehkai phutbol kaba jop wat hapdeng shibun ki jingeh. U la ong ruh ba ka MFA ka la shimkhia ban kyntiew ïa ka kam ïalehkai phutbol ym tang ha sor, hynrei ha kylleng ki jaka jong ka jylla.
U Bah Hamlet u la pynpaw ruh ïa ka jing-sngewkmen ba ka jingïalehkai phutbol ha ka jylla mynta ka long kaba la pawbha da kaba ïathuh ba mynshwa haba don ki jingïalehkai phutbol ha ki thaiñ nongkyndong, bunsien la ju khot ia ki nongïalehkai na sor, katba mynta ka la kylla khongpong haba don ki jingïalehkai ha sor, la khot da ki nongïalehkai na ki thaiñ nongkyndong kaba pyni ïa ka jingkiew jong ka jingïalehkai phutbol ha ka Jylla.
Ha kane ka sngi u Bah Hamletson Dohling u la ïathuh ruh halor ka jingthmu jong ka MFA ban sdang noh ïa ka Meghalaya Youth League na ka bynta ki samla kiba hapoh 14 snem ha ka kyrdan Sub-Junior Level bad kiba 16 snem ka rta ha ka kyrdan Junior Level bad kyrmen ba ha u bnai Jymmang yn sa lah ban pynlong noh. Ïa kine ki lympung yn phiah ha ki saw tylli ki Zone bad kyrmen ba lyngba kane ka sienjam kan ïarap ban kyntiew ïa ka kam ïalehkai phutbol hapoh ka Jylla hi baroh kawei.
