Shillong, Ïaïong 29
Ka Langsning FC ka la long sa kawei pat ka kynhun ka ban pynthikna ïalade ban jam sha ka semi final ha ka lympung ïalehkai Shillong Premier League 2023-24 ba la pynïaid da ka Shillong Sports Association.
Kane ka jinglah ban pynthikna ka la wan hadien ba ka la lah ban pynjem khnap ïa ka lahduh jong ka Meghalaya State League, ka Rangdajied United FC haduh 6-0 kol bad ka la long ka jingkhanglad shi syndon ïa ka Ryntih SC ban don ha ka jingïaknieh rung sha katei ka kyrdan ïakhun.
Wat la ka Rangdajied United ka la long ka kynhun kaba khlaiñ bor ha kane ka lympung ha kaba ka long ka kynhun kaba khlem pat shah rem ha ki hynriew sien ïakhun na ka bynta ban bat ïa ka kyrdan ba hakhlieh duh, pynban ha kane ka jingïakhun kaba khatduh ka la mad ïa ka jingshah rem kput ha ka Langsning haduh shteng dorjon.
U Nilson Rymbai u la u la khur ïa ka hat-trick da kaba thep haduh lai kol, katba ïa ki shi kol la thep da u Kitboklang Pale, Overkindness L. Mawnai bad u Sheenstevenson Sohktung.
Watla kine ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol. Hadien shiteng kynta ka Langsning ka la ïoh ban pynkhih jar nyngkong eh lyngba u Kitboklang Pale ha ka minit kaba 35 na ka bynta ban tam shi kol haduh kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet ka Langsning ka pynbud biang ïa ka kol kaba ar lyngba u Nilson ha ka minit kab 57. Kane ka kynhun hapoh ka jingïalam u Bah Hering Shangpliang ka la thep biang sa ar kol lyngba u Overkindness (60) bad u Sheensteven-son Sohktung (69).
U Nilson u la pynbud biang ïa ka kol kaba ar ka jong u ha ka minit kaba 79 bad hashwa ban wai u la khur syndon ïa ka hat-trick hadien ba u la ïoh ban thep biang sa shi kol ha ka minit kaba 90+2 na ka bynta ban khur syndon ïa ka jingjop.
Lyngba kane ka jingjop, ka Langsning ka la ïai neh ha ka kyrdan basaw bad kamai 12 point na ki hynriew ïakhun bad ka dang duna haduh 6 point ïa ka Rangdajied, kaba la dang ïai bat ia ka kyrdan ba hakhlieh jong kane ka lympung.
Ka jingïalehkai ha ka sngi Ba-ar kan long hapdeng ka Sawmer SC pyrshah ïa ka Nongthymmai SC ha ka por 3:15 janmiet.
