Shillong, Ïaïong 29
Ka Shillong Traffic Police (STP) tang hapoh shi taïew ba ka la pynlong ïa ka jingtalasi ïa ki kali bad ki ar shaka ka la ïoh ban lum haduh T.6.78 lak na ka jingdaiñ kuna ïa kiba pynkheiñ ïa ki kyndon aiñ ñiah kali.
Katkum ka kyrwoh ba la pyllait da u Superintendent of Police (SP) ka East Khasi Hills la ong ba kane ka jingtalasi ka la long naduh ka 22 tarik haduh ka 28 tarik mynta u bnai ba la leh ha kylleng ki bynta jong ka Sor Shillong, ha kaba la lap bun kiba la pynkheiñ ïa ki kyndon jong ka aiñ ñiah kali lane ka Motor Vehicle Act.
U SP u la pyntip ba tang hapdeng ka 22 haduh 28 tarik ha ka jingtalasi kali jong ki pulit pynïaid kali, la lap ba ki don haduh 684 tylli ki jingpynkheiñ ïa ki kyndon ñiah kali kum ka jingñiah kali hapdeng ka jingshoh khawiang ne buaid, ka jingpyndait ïa ki Modified Exhaust Pipes ha ki thuk-thuk bad kiwei kiwei.
Haba pyntip ba kane ka jingtalasi kali ka long kum shi bynta ban pynthikna ïa ka jingshngaiñ bad ïada ha ki surok, ka Shillong Traffic Police (STP) ka la kyrpad ruh ïa ki paidbah ba kin long kiba phikir haba ki ñiah kali bad ban bud pyrkhing ïa ki kyndon jong ka aiñ.
U SP u la pyntip ba ka tnat Pulit kan sa nang ïai bteng ban pynlong ïa kum kine ki jingtalasi kali bad thuk thuk ban pynthikna ba ka jingñiah kali bad thuk thuk kan long kaba shngaiñ ha ki surok.
