Shillong, Ïaïong 29
Ka Mawsynram Pink Panthers ka la lah ban pynthikna ban jam sha ka final ha ka lympung ïalehkai U-17 Girls Inter Cluster T20 Cricket Tournament 2024 ba la pynïaid da ka East Khasi Hills Cricket Association.
Kane ka jinglah ban pynthikna ka la wan hadien ba ka la lah ban pynliem noh ïa ka Sohra Super Nova da 5 wiket ha ka jingïalehkai kaba khatduh kaba la long ha ka Lah Sngi U Blei ha madan Shortimai Syiem kaba ha Smit.
Wat la ki la don tang saw tylli ki kynhun kiba la wan ïashim bynta ha kane ka lympung, hynrei ka Mawsynram Pink Pan-thers bad ka Sohra Super Nova ki la lah ban wan ha ki kyrdan ba kham sha-khmat bad kin pynkhreh ban ïaknieh ïa ka nam lahduh ha ka jingïakhun final ka ban long ha ka 1 tarik u Jymmang ha katei kajuh ka jaka ka ban sdang naduh ka por 8:30 mynstep.
Haba phai sha kane ka jingïakhun kaba khatduh, ka Sohra Super Nova ka la kam trai ban tied nyng-kong bad kamai 109 run na bynta ban duh 6 wiket ha ki 20 over. Ka Adela Kmen Lawai ka la tied 43 run na ki 63 bol. Katba ka Laphibanri Syiemlieh ka la shim 2 wiket na ka bynta ki 26 run ha ki 4 over na ka bynta ka Mawsynram Pink Panthers.
Haba wan shimti ïa ka pali kaba ar, ka Mawsyn-ram Pink Panthers ka la lah ban kynjoh sha ka thong da kaba kamai 112 run bad hap 5 wiket ha ki 17.2 over. Kane ka la wan lyngba ka jingïalehkai bha ka Eliza Lyngdoh kaba la ïoh ban khyrwit ïa ka shiteng spah da kaba ïoh 58 run na ki 52 bol. Katba ka Adela Kmen Lawai ka la shim 1 wiket na ka bynta ki 10 ha ki 4 over. Ïa ka nam Player of the Match la khur da ka Eliza Lyngdoh.
Ka jingïakhun final jong ka lympung ïalehkai kriket jong ki khynnah ba la tip kum ka (L) Benjamin Diengdoh Memorial U-15 Boys Inter Cluster T20 Cricket Tournament 2024 kan long ha ka 1 tarik u Jymmang ha kaba Sohra Cluster (A) kan ïakynduh pyrshah ïa ka Mawsynram Cluster naduh ka por 12 baje shiteng sngi.
