Shillong, Ïaïong 30
U President ka Hynñiewtrep Achik National Movement (HANM) Sengkmie, Bah Lamphrang Kharbani, u la ong ba kito ki nongkitkam kiba la phah shithi iehnoh kam na ka seng ka dei namar ki shu leh mynleh ban lait ka jah burom haba ki la shah beh seng.
Haba ïakren bad u Bah Lamphrang ha shlem treikam jong ka seng ha Mawkasiang, u la ong ba ka HANM kam kwah ban ïathad para jaidbynriew namar ki dei kum ki hynmen ne para namar ka thong ban ïada ïa ka jaidbynriew.
U la ong ba ka seng kan beh nokot nokot ïa ki briew kiba wan riehtngen tang ban pynbud nam ïa ka seng namar ka thong jong ka HANM ka long ban ïada ïa ka jaidbynriew.
U la pynshai halor ka jingong u Bah Nelson Kharbani kum u Vice President ba ka seng ka don ka kynrum- kynram hynrei kam don kum kata namar ka jingkhihwin ka dei para ma ki haba ki mut ban mih noh na ka HANM.
Haba ïadei bad u Bah Kyllang, u Bah Lamphrang u la ong ba wat kdew kti ïa kiwei namar saw tylli ki kdew ïa u hi tangba um kwah ban wad daw namar baroh ki dei ki kam shimet jong u.
“Haduh mynta ngam pat dei u dkhot jong kano-kano ka seng saiñpyrthei namar nga dang dei u nongïalam ka HANM hynrei kita kiba kynnoh ki dei ma ki, ki mynnong (agent) jong kiwei pat” u la ong.
U Bah Lamphrang u la pynpaw ba un nym sngewphylla shuh namar ki la don kiba la mih bad thaw seng thymmai tangba kim shym la poi sha ka thong.
Kumta u Bah Lamphrang u la ong ba nangne shakhmat kino-kino ki nongkitkam kiba shu bat ïa ka shuki ki khlem mih ne ki khlem trei smat ïa ka seng yn beh beit khlem jingmap.
Kum ban shu pynkynmaw, u Bah Kyllang Thongni kum u General Secretary bad Bah Nelson Kharbani kum u Vice President ki la mih noh na ka seng HANM ha ka janmiet ka 29 tarik Ïaïong da kaba kynnoh ba kim sngewtynnad shuh ïa ka jingmih ha rynsan lad pathai ba u Bah Lamphrang u shondur haba u leit thep ‘vote’ ha ka shap jong ka kot ha ka ilekshon MP Lok Sabha.
