Shillong, Ïaïong 30
Ka Voice of the People Party (VPP) ka la pynpaw ba ka dang kloi palat ban ong eiei halor ka komiti ki ‘riewshemphang ne Expert Committee ba la thung da ka Sorkar ban khmih bniah ïa ka bhah thung kam ne ka Meghalaya State Reservation Policy, 1972, hynrei kan ap haduh ban da pynmih shuwa ïa ka kaiphod.
“Ngin peit ïa ka kaiphod. Kumba ka long mynta, ngi ïohi ba ki kam ki tyllun, hynrei ka dang kloi palat ban ong eiei,” la ong u nongaiktien ka VPP, Dr. Batskhem Myrboh ha ka Sngi Ba-ar.
Haba kdew ba ka komiti ka la ïaid shakhmat bad ki kam, u nongaiktien u la ong ba u la ïohi ba ka komiti kan sa pynlong ruh ïa ka jingpynsngew paidbah bad ha kaba ïadei bad kane, ka seng kan sa shong pyrkhat ban khmih bniah halor ka jinglong-jingman jong ka komiti.
“Kumba ka long mynta, ki kam ki la ïaid shakhmat,” u la ong.
Ha kajuh ka por, haba pynkynmaw ba ïa katei ka komiti la thaw ha u snem ba la dep ban khmih bniah ïa ka bhah thung kam, u nongaiktien u la ong ba ka seng kam kwah ban tynruh than ïa ka Sorkar naba ka sngewthuh ïa ka por.
Haba pynsngew ba ka VPP ha u Lber mynta u snem ka la thoh sha ka Sorkar ban ïoh jingtip halor ka jingtreikam ka komiti bad haduh katno ki kam ki la ïaid, u Dr. Myrboh u la ong ba ka Sorkar ha ka 25 tarik mynta u bnai ka la jubab bad batai shaphang ki jingïalang bapher-bapher kaba ka komiti ka la pynlong.
“Kane ka paw ba ka komiti ka pyntyllun ïa ki kam,” u la ong.
Kum ban shu kdew hangne, ka komiti ha ka jingïalang kaba ar jong ka ha ka Sngi Saitjaiñ ka la rai ba shen kan sa pynmih ïa ka jingpynbna paidbah na bynta ki jingïamir jingmut, ban pan ïa ki jingai jingmut bad ki jingkynthoh halor ka bhah thung kam.
Ha kajuh ka por, la rai ban sa pynlong ïa ki jingpynsngew paidbah ha Shillong bad ha baroh ki distrik ‘Headquarter’ ne kiwei-kiwei ki jaka katkum ka jingrai ka komiti hadien ba la ïoh pdiang ïa ki jingkynthoh, jingai jingmut na ki nongshong shnong ba don ka jingsngewkhia halor kane ka bynta.
Hadien hynriew bnai ba la thaw ïa ka, katei ka komiti ka ban khmih bniah ïa ka bhah thung kam ka la pynlong ïa ka jingïalang banyngkong jong ka ha ka 8 tarik, Lber mynta u snem hapoh ka jingkhlieh u Justice (Retd) Mool Chand Garg.
Kane ka komiti ki ‘riewshemphang kaba la thaw ha ka 12 tarik Nailur mynshem snem, kan hap ban aiti ïa ka kaiphod sha ka Sorkar Jylla hapoh 12 bnai.
Kiwei-kiwei ki dkhot jong ka komiti ki kynthup ïa u Justice (Retd) Dr. Satish Chandra, nongbishar barim ka Allahabad High Court; Prof. D.V. Kumar jong ka tnad pule Sociology, NEHU; Prof. Chander Shekhar na ka tnad pule Fertility & Social Demography, Indian Institute of Population Sciences (Deemed to be University), Mumbai bad Prof. Subhadip Mukherjee, Assistant Professor ka tnad pule Economics bad Public Policy ha IIM Shillong.
Ka jingïalang kaba bud jong ka komiti kan long ha u bnai Jymmang mynta u snem.
