Shillong, Ïaïong 30
Ka jingmynsaw ki ar ngut ki rangïalehkai ka la pynkhuslai ïa ka Borussia Dortmund, hynrei na ka liang u coach u Edin Terzic u la khmih lynti ba kine ki ar ngut ki rangïalehkai kin lah ban mih madan ha ka jingïakhun semi final (first leg) jong ka Champions League pyrshah ïa ka Paris Saint-Germain (PSG) ka ban long ha ka miet jong ka sngi Balang.
U Terzic u la pynpaw ha ka sngi Ba-ar ba u rangïalehkai ‘dien u Ramy Bensebaini lem bad u rangïalehkai shakhmat u Julien Duranville ki lah ban duh ïalehkai ha ka sngi Balang, hynrei kiwei ki lah ban wanphai sha ka jingïakhun hadien ba ki la duh ïalehkai ha kaba ka kynhun ka la shah rem da 4-1 kol ha Leipzig ha ka lympung ïalehkai Bundesliga kaba la long ha ka sngi Saitjaiñ.
U Emre Can bad u Ian Maatsen ki la lah ban wanphai biang sha ka kynhun hadien ba ki la shah sospon ha kane ka taiew ba la lah.
“U Marcel Sabitzer bad u Donyell Malen ki la ïashim bynta ha ka prokram kilanmet biang hynnin ka sngi,” la ong u Terzic da kaba bynrap ba u Donny um pat lah ban ïalehkai bha, hynrei kaba pynkhmen ïa ka kynhun ka long halor u Marcel uba la kham ïoh bor. “U Sebastien Haller u la ïoh ban ïashim bynta ha ka jingkilanmet bad ngin hap ban bishar thuh ïa u la u la biang ne em ban ïalehkai watla ki lah ban ïadon lang bad ka kynhun ha ka sngi Balang.”
U rangïalehkai shakhmat na Ivory Coast u Haller u dangson hapdeng ka jingshah sumar na ka daw ka jingmynsaw ka kjat.
Ka Dortmund, kaba la lah ban pynliem ïa ka Atletico Madrid na ka bynta ban rung shaka semi final, ka la ïakynduh teng ia ka PSG ha ka jingïalehkai (group) ha kaba ka la shah rem da 2-0 kol ha Paris hashwa ba kan ïakhaid ha la ïing da mar 1-1 kol bad ka la ïoh ban bat ïa ka kyrdan ba hakhlieh na ka group.
Kumba ka paw katei ka kynhun kaba na Germany ka long ka kynhun kaba khlem shah rem ha ki shiphew sien ïakhun ba la lah jong kane ka lympung ha la ïing bad mynta ka kynti ka la khmih lynti ban ïoh ka jingkyrshan na ki paidbah.
Hynrei na ka liang u Terzic u la tip bha shaphang ka PSG namar ka la long ka lahduh ha ka lympung ïalehkai ha France bad mynta ka kynti ka la khmih lynti ban khur ïa ka jingjop sa ha kane ka lympung.
“La pynkhlaiñ bha ïa ka kynhun naduh ki snem ba la lah bad ka jingthmu hi ka long ban khur ïa ka nam lahduh ha ka Champions League,” la bynrap u Terzic da kaba ong ba ha kaba sdang jong ka aïom kam shym la lah ban ïalehkai bha, hynrei ka la lah ban pynpaw ïa ka jingtbit.
Na ka liang u Terzic u la pynpaw ba ka kynhun jong u Luis Enrique ka la long ba la pynkhreh bha. “Kam long kaba suk ban pynliem ïa ka watla baroh ki kynhun ki la pyrshang ban khanglad ïa ka.”
Kane ka kynhun ka don ïa u khlur ïalehkai ba kynsai u Kylian Mbappe, uba la lah ban thep haduh 43 kol ha ki 44 sien ïakhun.
