Shillong, Ïaïong 30
Ka kynhun ki samla thep kam hapoh ka jingïalam jong ka samla Barilang Pyngrope, ha ka 30 tarik u Ïaïong ki la leit ban buh da ka jingthoh ne ka ‘Representation’ hakhmat u Secretary ka tnat Pohïing ka Sorkar Jylla, u Bah Cyril V. Diengdoh, IAS ha kaba ïadei bad ka jingpynrit ïa ka rta thep kam hapoh ka tnat Pulit katkum ka byrta ba la pynmih dang shen khlem da pynmih shwa ïa ka jingpynbna.
Ka jingmih jong kine ki samla thep kam shakhmat ka long hadien ka jingleh mynthi jong ka sorkar jylla halor ka jingdawa ban ai jingpynshai halor ka jingpynmih ïa ka rai da ka sorkar ban pynrit ïa ka rta thep kam nalor ka jingbym mih ka ‘Notification’.
Haba kren sha ki lad pathai khubor, ka samla Barilang Pyngrope ka la ong hadien ba la ïohi ba ka sorkar ka la buh ïa ka thup ki kyndon ba la pynbeit biang ne ki ‘Revised Guidelines’ khlem da pynmih ïa ka ‘Notification’ ka la pynlong ïa kitei ki samla wad kam ban mih shakhmat ban pynpaw ïa ka jingpyrshah halor kane da kaba ki la wan ban buh da ka jingthoh ne ka ‘Representation’ ha u Secretary ka tnad pohïing ka sorkar jylla.
Ka samla Barilang ka la ong ba ka rukom pynrit ïa ka rta khlem da bud ïa ka Office Memorandum ka long kaba be-aiñ. Kumta na ka liang ka kynhun ki samla wad kam ki la ai jingmut ba lada ka sorkar kam lah ban pynbeit ïa kine ki jingdkoh kiba long be-aiñ, kim banse ban leit kiew shaduh ka ïing kashari ban ujor halor kane ka jingleh jong ka sorkar jylla.
“Ngi ïohi ba ki ‘Revised Guidelines’ ki la buh khlem ka ‘Notification’ na kata ka daw ngi la wan ban ujor da ka ‘Representation’, lada ka long ruh ngim banse ban leit noh shapoh ka ïing kashari namar ngim lah ban shu shah beit ïa kane ka jingbym bud jong ki katkum ka ‘Notification”, la ong ka samla Barilang.
