Shillong, Ïaïong 30
Hadien ka jingpaw ka sap ïalehkai ba kyrpang jong uwei u heprit na ka shnong Mawryngkneng, ka Minerva Punjab Football Academy ka la khot kyrpang ïa u Samborlang Rynjah uba dang 6 snem ka rta ban ai jinghikai bad ka la pynkhreh lypa ryngkat ka baibam.
U Director ka Minerva Academy u Ranjit Bajaj u la pynpaw ka jingsngwkmen ban ïohi ïa ka sap ba kyrpang jong utei u heprit uba na ka shnong Mawryngkneng. “Ngam pat ju ïohi ha ka jingim ka jong nga ïa ka sap ba kyrpang ki khynnah ha ka rta kaba dang 6 snem ban pyni ïa ka jingtbit ha ka kam ïalehkai kum u rangapkol.”
“Lada une u heprit um ïoh ïa ka jingshah hikai kaba paka naduh ba u dangrit ka rta, ka sap ïalehkai kaba kyrpang ka jong u kan shu long lehnohei. Te kumta ngi na ka liang ka Minerva Academy ngi kwah ban ai jinghikai ryngkat ka baibam khlem da donkam ban da khmih bniah ïa ki jingdonkam na ka bynta jong u namar u la long uba biang lypa ka sap ïalehkai ba kyrpang jong u. Baroh ki jingdonkam naduh ka bam ka dih, ka jingpynshong skul, ki tiar ïalehkai bad kiwei kiwei ki jingdonkam yn pynbiang lut da ka Minerva,” la ong u Ranjit.
“Ngi kwah ban ai jinghikai pura ïa u khnang ba un long uwei na ki rangapkol ka kynsai ha ka lawei ka ban wan na ka bynta ka Minerva. Ngi kyrmen ba ha ka lawei ka ban wan ngin ïohi ïa u ba un ïoh ban phong ïa ka jersey jong ka India bad ha ki shiphew snem ki ban wan un ïoh ban ïalehkai ha ka kyrdan senior.”
Na ka liang ka kmie jong u Samborlang, ka Kong Kyntiewlang Rynjah ka la pynpaw ka jingangnud ba u khun jong ka un ïoh ka jingshah hikai kaba paka namar u don ïa ka sap ïalehkai ba kyrpang naduh ba dangrit. “Hooid ka don ka klob kaba na Punjab kaba la kwah ban ai jinghikai ïa u Samborlang. Te kumta nga kum ka kmie nga kwah ban phah ïa u sha katei ka shlem ai jinghikai khnang ba un ïoh ka jingshah hikai kaba paka ha ka kam ïalehkai phutbol.
Lah ban pynkynmaw ba kane ka jingpaw utei u heprit ha ka kam apkol ka dei lyngba ka jingsaphrang ka dur khih jong u ha ki rynsan social media bad kine ki dur khih ki jong u ki la poi shaduh u khlur apkol ka Argentina, u Emiliano Martinez. Une u khlur apkol uba la ïohpdiang ïa ka khusnam Golden Gloves ha ka FIFA World Cup 2022 kaba la long ha Qatar, u la buh ïa katei ka dur khih jong utei u heprit hapoh ka sla ‘instagram’ lajong bad dei hangne ba ki million ngut ki briew kiba la sakhi ïa katei ka sap ba kyrpang jong utei u heprit uba na Mawryngkneng
Ym tang ka Minerva Academy, hynrei kiwei pat ki klob jong ka Indian Super League ki la pynpaw ka jingkwah ba kin shimti ïa utei u heprit bad ba kin ai jinghikai ïa u khnang ba un long u rangapkol uba tbit bad uba ba kynsai jong ka ri.
