Shillong, Ïaïong 30
Ka Sawmer SC ka la pynkut da ka jingjop kaba ar ha ka lympung ïalehkai Shillong Premier League 2023-24 hadien ba ka la lah ban pynliem noh ïa ka Nongthymmai SC da 2-1 kol ha ka sngi Ba-ar ha SSA Stadium kaba ha First Ground, Polo.
U Shining Nongdhar bad u Rheadolf N Doloi ki la ïoh ban thep kol na ka bynta ka Sawmer, katba u Rabi Mansda u la lah ban pynphai kylla shi kol na ka bynta ka Nongthymmai.
Hadien ba ka la lah ban pynliem dangshen ïa ka Ryntih SC da 4-0 kol, ka Sawmer ka la lah ban pynpaw ïa ka mynsiem ïakhun ban ïalehkai bha ha kane ka jingïakhun bad tang ha ka minit kaba 11 ka la ïoh ban pynkhihjar nyngkong eh lyngba u Shining. Kane ka shi kol ka la nang pynïoh mynsiem ïa kane kynhun ban ïakhun tyngeh bad ha ka minit kaba 30 ka la ïoh ban thep biang ïa ka kol kaba ar lyngba u Rheadolf na ka bynta ban tam 2-0 kol haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet ka Nongthymmai ka la ïakhun tyngeh ha kaba ka la ïoh ban pynphai kylla shi kol lyngba u Rabi ha ka minit kaba 67. Wat la kane ka kynhun ka la bteng ban ïakhun tyngeh, hynrei haduh kaba kut ka jingïalehkai kam shym la lah shuh ban thep kol bad ka la mad ïa ka jingshah rem kaba hynriew ha kane ka lympung.
Lyngba kane ka jingjop, ka Sawmer ka la jam sha ka kyrdan ba hynriew ryngkat bad 6 point ha ki hynñiew sien ïakhun, katba ka Nongthymmai ka la ïai sah ha ka kyrdan ba shatrai bad ïa ryngkat mar 3 point bad ka Nangkiew Irat.
Kumba ka paw ha kane ka aïom ïalehkai ym shym la don ki kynhun ki ban shah pynhiar kyrdan namar na ka liang ka SSA ka la thmu ban kyntiew haduh 10 tylli ka jingdon ki kynhun ha ka aïom ïalehkai 2024-25 ha kaba yn kynthup lang ïa ka Laitkor SC bad ka Nongrim Hills SC kiba la kiew kyrdan na ka First Division.
Ka jingïalehkai ha ka sngi Balang kan long hapdeng ka Nangkiew irat SC pyrshah ïa ka Shillong Lajong FC ha ka por 3:15 janmiet.
