Shillong, Jymmang 01
Kan dei ka sien kaba nyngkong eh ba ka Meghalaya Roll Ball Association ka la wan shakhmat ban pynbna paidbah na ka bynta ban pynlong ïa ka 4th Senior Roll Ball Federation Cup ka ban wan ïashim bynta da 11 tylli ki kynhun na ki jylla bapher bapher jong ka ri.
Ïa kane ka jingïakob yn pynlong ha ki ar sngi kata ha ka 4 bad ka 5 tarik mynta u bnai Jymmang ha basketball court jong ka skul St Anthony’s Higher Secondary School.
Ki dkhot ka Meghalaya Roll Ball Association kaba lamkhmat da u Bah Suklang Dkhar kum u President, Bah Joshua Sohtun kum u Vice President bad u Bah Francis Mylliem Umlong, ki la pynpaw ha ki lad pathai khubor ïa ka jingthmu ban pynlong ïa kane ka jingïakob ha ka sien kaba nyngkong eh ha kane ka nongbah bad kane ka long ruh shi bynta ban pynpaw pyrthei ïa kane ka jait jingïalehkai kaba dangthymmai ha kane ka Jylla.
Te kumta kane ka synjuk ka la khot bad wer ïa ki paidbah ba kin wan ban sakhi da la ki jong ki khmat ïa kane ka jingiakob bad ruh ban ai mynsiem ïa la ki khun samla.
