Mawlangwir, Jymmang 01
Hadien ka jingjah jong u samla Shanborlang Lyngdoh (27 snem ka rta) na ka shnong Mawlangwir naduh ka 26 tarik u Lber, 2024, ki bahaïing hasem naduh ka kmie, ka kurim jong u ryngkat ka shnong Mawlangwir bad Mawsaiñ kaba u leit shongkha, ki la sah ha ka umdum bad sah ha ka lyngngoh ïa ka jingbym wanphai shuh jong u sha la ïing mynta la kumba shi bnai tam wat hadien ba ki la wad bad pyntip sha ki bor pulit hynrei ym shym la lap dien satia ïa u.
Ka kmie bapli, ka Kong Lotilda Lyngdoh kam lah khlem da jaw ki ummat kthang bad pynpaw ka jingkhia mynsiem ha kaba ka la kyprad ïa u Shanborlang ba un wanphai noh sha ïing lada u don hangno-hangno ruh.
“Wan noh sha ïing khun, ngi lynga, ngi pisa mynsiem namar ngi khlem ïohi shuh ïa phi, lada phi ïohsngew ïa ka jingkren jong nga wan noh, ngi dap tang ki jingsngewsih namar la shi bnai phi khlem wanphai shuh sha ïing,” la ong ka kmie.
Kumjuh na ka liang ka shnong Mawlangwir lyngba u Myntri Shnong, u Bah N.S. Wanniang bad u Secretary Shnong Mawsaiñ, Bah R. Snaitang lem bad ka kurim, ka Kong Pynhunlang Mylliem sa shisien ki kyrpad ïa u samla Shanborlang Lyngdoh ba un wanphai noh kloi sha ïing bad kyrpad ruh ïa ki paidbah ba lada ki ïohi ïa u kin sngewbha ban pyntip lem sha ki bahaïing hasem ne ha ki nombor – 8787428772, 8787832956, 9366835012 bad 9485146567.
Kum ban shu pynkynmaw, u samla Shanborlang Lyngdoh u la mih khatduh na ïing lok na Mawkyrwat ha ka step jong ka 26 tarik Lber, 2024 ha ka por kumba 9 baje eiei ha kaba u la ong ïa ka lok ba un leit shim tiar tang shiphang, hynrei haduh mynta u khlem wanphai shuh sha ïing bad haba pyrshang ban ‘phone’ ha kajuh hi ka sngi ka ‘phone’ jong u ka la lip noh.
