Shillong, Jymmang 01
Ka jingmih ka YouTube ha kane ka juk kaba mynta lada ngi nang ban pyndonkam ka la long shisha ka jingkyrkhu ïa ki samla kiba donsap la ha sor ne nongkyndong. Kane ka long namar uwei u samla uba sah ha Lumdaitkhla, Bhoirymbong, Ribhoi District u la paw pyrthei hadien ba ki paidbah ki la sngewtynnad ban sngap ïa ka jingrwai kaba la pynmih lang bad ka durkhih kaba ai kyrteng Bolbering.
Une u samla u dei ba la tip kyrteng kum u Amunick Shadap. U la rwai hi ïa kane ka jingrwai ‘Bolbering’ kaba u la thep ha YouTube bad kot 2 million shiteng view ne 25 lak ngut kiba peit hapoh shibnai kaba u la thep ha ka 30 tarik Lber 2024.
Ïa kane ka jingrwai la ringdur da u Bah Elvest Thabah kaba la ak da u Bah Keebor Kurbah uba la tip kum u Marangbah, u Wanstar Thabah bad Barisha Kharumnuid.
Ka jingkiew sted kane ka jingrwai ha YouTube, ka dei namar ki paidbah ki itynnad ban peit ïa ka jingtbit u Marangbah ban ak, ka jingsngewtynnad ka sur u Amunick bad ka jingitynnad haba ki ïohi ïa ka Bolbering.
Ban tip kham bniah ïa ka jingmut jong kane ka jingrwai Bolbering, U Nongsaiñ Hima naduh Shillong u la hiar sha Lumdaitkhla, Bhoirymbong ban ïakynduh kyrpang ïa u samla Amunick haduh ha ïingsah jong u.
Haba ïakren bad u samla Amunick u la ïathuh ba ka jingpoi ban ai kyrteng ‘Bolbering’ ka dei ha kawei ka sngi ba u leit dihsha ha kawei ka dukan u la ïohi ïa ka bolbering kaba la pyndonkam ban kit ïa ki tiar ki tar bad kit um, bad kumta ka la pynlong ïa u ban shna jingrwai.
U la ïathuh ba kane ka jingrwai (Bolbering) ka dei kaba hynñiew namar ka jingrwai kaba nyngkong kaba u ïoh rwai ka kyrteng Suki-Suki.
“Ngam poi pyrkhat ba ki paidbah kin sngewtynnad ïa ka jingrwai jong nga namar naduh dangrit ngam donsap ban rwai hynrei nga ju rwai haba nga don ha kamra sum” u la pynpaw.
U la ïathuh ba ha Bhoirymbong ki dang bun ban pyndonkam ‘Bolbering’ ban kit jingkit, hynrei ki don ki shnong kiba dang pyndonkam bad don ki shnong ki bym pyndonkam shuh.
U la ai khublei ïa ki bahaïing bad ki paralok kiba la pynshlur ban thaw noh da ka jingrwai Bhoi namar ha kine ki jingrwai ba la dep thaw shaphang ka jingieid kam da ïaid than bad mar shu pyllait ïa kane ka jingrwai ‘Bolbering’ ka la ïaid ïew shisha ban pynsngewtynnad ïa ki paidbah.
U samla Amunick u la ïathuh ba un dang bteng biang ban pynmih shuh shuh ki jingrwai.
