Shillong, Jymmang 01
Ka jingshit kyrang ka suiñbneng bad ka jingbym hap slap ka la pynlong ïa ki tyllong um bad ki jaka ba den ïa ka um ban shah ktah bad ka jinglong-jingman ka suiñbneng ka pynkhuslai namar kin don ki jaka ki ban sa mad ïa ka jingkyrduh um.
Kawei na ki jaka den um ban tan umdih kaba la shah ktah ka dei ka jaka pynlang um ha Maw-phlang kaba dei ban sam umdih lyngba ka Greater Shillong Water Supply Scheme (GSWSS) kaba ju sam um sha ki paidbah ka nongbah Shillong bad ki shnong ba marjan.
U karikor ka tnat PHE ha ka Sngi Balang u la pyntikna ba ka um ha dam Mawphlang ka la hiar namar ka jingnang rit ka um ha Wah Umïew kaba dei ka tyllong um kaba tuid sha Mawphlang.
La ong ba ka tnat PHE ka la phah ïa ka kynhun ban leit peit ïa ka jinglong-jingman jong ka um ha dam Mawphlang ha kaba la shem ba ka um ka nang hiar hynrei ym pat lah ban ai jingtip kaba kham bniah haduh katno ka um ka la hiar na kaba ju don baroh shikatta.
Ka dam ha Mawphlang ka dei kaba la den khnang na ka bynta ban tan umdih lyngba ka GSWSS ban pynpoi um sha Shillong.
Ka jingthang khlaw nalor ka jingshit kyrang ka sngi ka dei kaba ktah bha ïa ka GSWSS khamtam lada ym lah ban sumar ïa ki khlaw ki btap kan nang duna ka jingïoh um.
Ka jingjylliew ka dam ha Mawphlang ka long kumba 1577.5 meters hynrei dang ap ïa ka kaiphod kaba halor ka jinglong-jingman ka um ha Mawphlang.
