Shillong, Jymmang 01
Ka jinglong-jingman jong ka umbam-umdih ha ka jylla ka la shah ktah jur mynta u snem namar ka jingshit kyrang bad jingrang tyrkhong kaba la neh la bun taïew, bad kane ka la pynlong ïa u Myntri Rangbah, u Conrad K Sangma, ba un lum un lang da ka jingïalang bad ki heh sorkar na ki tnat bapher-bapher ban rai kaei kaba dei ban leh ban pynduna ïa ki jingeh jong ki paidbah.
Ïa kane ka jingïalang la pynlong ha ka Sngi Balang hapoh ka jingpynïaid jong u Myntri Rangbah ha kaba la wan ban ïashim bynta da u Myntri ka tnat PHE & Soil and Water Conser-vation, u Marcuise N Marak, u Chief Secretary, bad ki heh na ka tnat PHE, Soil and Water Conservation, Water Resources, Forest & Environment and Climate Change bad kiwei-kiwei.
Haba kren bad u nongai khubor hadien ba la wai ka jingïalang, u Conrad u la ïathuh ba ka jingrang tyrkhong mynta u snem ka kham jur ban ïa ki snem kiba la leit noh. U la ong ki daw ki long na ka jingkylla ka suiñ bneng (Climate Change) bad kiwei pat kiba ïadei bad ka mariang. Nalorkata, u la ong ba ka jingshah ktah jong ki tyllong umbam ka kham shyrkhei mynta u snem ban ïa ki por kiba la dep.
U Conrad u la ïathuh ba ha katei ka jingïalang la peit bniah ïa ka jinglong-jingman ha ka jylla baroh kawei ba kynthup lang ïa ki jaka sor bad nongkyndong.
Ha katei ka jingïalang, la rai ban shim ïa ki sienjam ban teh lakam bad ban pynduna ïa ka jingduna umbam, bad kine ki sienjam ki kynthup lai bynta. U la ong ruh ba la shim bun ki rai ban pyntreikam khamtam ha ki jaka sor khnang ban pynduna ïa ka jingkyrduh umbam ha ki snem ki ban wan.
“Kawei na ki sienjam ba la rai ban shim ka long ban phah da ki kali kit um sha ki shnong bad ki dong kiba mad bha ïa ka jingkyrduh um,” la ong u Myntri Rangbah.
Ha kajuh ka por, la rai ban kyntu ïa ki paidbah ba kim dei ban pynsepei kai ïa ka um. “Nga shim ïa kane ka lad ban kyntu, lyngba ki lad pathai khubor, ïa ki paidbah ba kin ïai shah lang bad ngi namar ngi don hapdeng ka jingeh. Nalorkata, ngi kyntu ïa ki paidbah ba kin long kiba kitkhlieh ha ka jingpyndonkam ïa ka um khnang ban ym pynsepei kai ïa ka,” u la bynrap.
U Conrad u la ong ba ki dang don bun kiwei pat ki rai ba la shim ki ban sa pyntreikam mynta u snem bad ka don ka jingkyrmen ba yn sa lah ban kham pynbha bad pynbiang ïa ka umbam-umdih sha ki paidbah.
