Shillong, Jymmang 01
Ki nongkitkam jong ka Mawkhar Dorbar Shnong (MDS) ha ryngkat ka jingsynran lang ki ophisar na ka tnad Shillong Municipal Board (SMB) ha ka Sngi Balang ki la leit ban jurip ïa ka jaka pynïeng kali ne ka Mechanized Multilevel Car Parking Lot (MMCPL) kaba ha Stad Jaïaw, Motphran.
Ïa kane ka projek hapoh jong ka Shillong Smart City Mission la pynsangeh noh shuwa shi por ïa ka jingpyntrei hadien ba ka la mih ka jingujor na ki trai ïing kiba sah marjan bad katei ka jaka ba ka don ka jingkhih ha ka por ba pyntrei ïa ka kam (ha katei ka jaka).
“Kane ka long shi bynta jong ka Smart Project, kawei ka dei hangtai ha ophis District School Education Officer (DSEO), DI of Schools, bad hangtai, kane ka projek ka la ïaid shakhmat. Na bynta ka jaka ïeng kali jong ka Jaïaw kaba la sdang mynta, ka don ka jingthut khyndiat haba ïadei bad kane ka jingtrei,” la ong u Assistant Rangbah Shnong ka MDS, Bah Ransom Sutnga haba kren sha ki lad pathai khubor.
Haba pynsngew ba ka Dorbar Shnong ka kwah ba kane ka kam kan ïaid beit bad kan ym sangeh naba kane ka kam ka dei ka ‘Pet Project’ jong ka Dorbar Shnong, u la ong ba hadien ba la ïoh jingujor ba don kiba ujor ban phah pynsangeh ïa kane ka kam, ka shnong ka la rai ban wan hi dalade ha kane ka jaka ban sngewthuh la ka dei shisha ne em kumba la ujor.
“Hadien ba la ïakren bad ki ophisar na ka tnad Municipal, ngi lap ba kam don kano-kano ka jingthut ne jingktah haba ïadei kitei ki ïing mala. Na kata ka daw, ngi wan hangne mynta ban ong ba kane ka kam kam dei ban sangeh bad ka dei ban ïaid beit shakhmat,” la ong u Bah Sutnga.
Ha kawei ka liang, u la ong ba kitei ki 2 tylli ki projek kin long ka jingkyrkhu ïa ka dong ka thaiñ khamtam ïa ka shnong Mawkhar.
“Kane ka dei ka jingtei kaba bun mala bad na bynta ka projek hangne kan long na bynta 115 tylli ki kali – kan long ‘Automated’ nadong-shadong bad kaba ha DSEO kan long na bynta 85 tylli ki kali,” u la ong da kaba bynrap ba ïa kane ka projek dei ban pyndep hapoh 12 bnai.
Shuh shuh haba batai halor ka projek, u Assistant Rangbah Shnong u la ong ba kane ka projek ka dei ka ‘Build Operate Transfer’ (BOT) hapoh jong ka Smart City Project – ïa kane ka projek la shna da ka kompeni bad kin pyntreikam ma ki, bad hadien ynda la kut ka jingïateh, kin sa aiti noh sha ka Sorkar.
“Ngi kyrmen skhem ba kum ka shnong ngin sa ïashim bynta lang ynda la kut ka por treikam jong kane ka kompeni haba ïadei bad ka jingpynïaid ïa kane ka jaka pynïeng kali,” u la ong.
