Shillong, Jymmang 01
U khlur nongkiew lum ka Jylla bad uba long ruh u General Secretary ka Meghalaya Sport Climbing and Mountaineering Association (MeSCMA) u Bah Wallambok Lyngdoh u la shah thung ha ka Indian Mountaineering Foundation (IMF), New Delhi ban long kum u nongïalam ban ïashim bynta ha ka jingkiew ïa u lum Tinchinkhang uba don ka jingjrong 6010m ha Sikkim Himalayas.
Kumjuh ka IMF ka la jied ruh ïa 9 ngut ki nongkiew lum na ki phra tylli ki jylla jong ka thaiñ thatei lammihngi kynthup ïa ar ngut na ka jylla Meghalaya kata ka samla Ngandarihun Sohshang na Mawlai Nongpdeng, Shillong lem bad u Rilang Dkhar na Umshaken, Ri-bhoi District. Kane ka jingkiew lum ka la sdang naduh ka 1 tarik mynta u bnai bad kan kut haduh ka 21 tarik.
Mynta u snem ka IMF ka la thmu ban pynlong bad ruh ban bei tyngka na ka bynta ki jingkiew lum ha ka sien kaba nyngkong eh ha Sikkim Himalaya na ka bynta ki nongkiew lum kiba dangkhynnah jong ka thaiñ shatei lammihngi ha ryngkat ka jingïatrei lang bad ka Indian Himalayan Centre for Adventure and Eco-Tourism (IHCAE), Chemchey, Sikkim.
Ka IMF ka dei ka synjuk kiew lum kaba hakhlieh duh jong ka ri, kaba ju ïaleh ban kyntiew da kaba pynlong ïa ki jingkiew lum hapoh ka ri bad shabar ri ruh kumjuh bad ka dei ruh kaba la pynïasoh sha ka International Mountaineering and Climbing Federation (UIAA).
Kiwei pat ki nongkiew lum kiba na ka thaiñ shatei lamihngi kiba la shah jied na ka bynta katei ka jingkiew lum ki kynthup ïa u Sonam Gyatso Lepcha (Sikkim), ka Neaha Rai (Sikkim), Radha Khatri (Sikkim), Maro Meto (Arunachal Pradesh), Lalruatdika (Mizoram), Yierhevitso Vakha (Nagaland) bad u Biplab Das (Tripura). Katba kiwei pat ki ar ngut ki nongkiew lum kiba na Manipur bad Assam ki la weng noh ïalade na kane ka jingleit shim bynta.
