Mawkyrwat, Jymmang 01
Ka long kaei-kaei ka jingkmen kaba khraw bad ka sngi ka ban sah kynmaw ha ka jingim u heprit Elambok Dkhar (13 snem ka rta) kumjuh ka jingsarong ïa ka ïing ka sem bad ka shnong Wahsiej ha kaba une u heprit u la ïoh ïa ka jingithuh bad jingkhublei na u Myntri Rangbah ka Jylla, u Conrad K. Sangma na ka bynta ka kam shur jong u khlem da kheiñ ïa la ka jingim ban pyllait im ïa kawei ka ‘thei samla kaba lajan ngam jyllop ha Wah Rilang.
Ha ka step Sngi Balang, ka 1 tarik u Jymmang 2024, u heprit Elambok Dkhar ryngkat ka khaduh, ka Kong Ridalin Skhemlon bad u Parad jong u, Bah Muklen Thongni ki la mih na la ïing, na ka shnong Wahsiej ban leit ïakynduh ïa u Myntri Rangbah ha ïingsah jong u ha Shillong.
U heprit Elambok Dkhar, uba long ruh u khunswet u dei uba dang pule ha ka klas VII ha ka skul Christian Principal Academy ha Mawkyrwat bad da ka khmat kaba phuh samrkhie bad ka jingkmen, utei u heprit u la rung sha ka ïingsah u Myntri Rangbah ban pdiang ïa ka syrnod jingai jingithuh, jingïaroh bad jingpynshlur ïa u.
U Sangma hadien ba u la ïoh jingtip ïa ka kam shlur jong utei u heprit u la kwah ïakynduh ïa u markhmat ban ai ka jingkhublei bad ka jingïaroh.
Kum ban shu pynkynmaw, ha Sngi U Blei, 21 tarik u Ïaïong, 2024, 4 ngut ki khynnah samla kynthei ki la leit jngi ha Wah Rilang bad ha kane ka jingjia, 2 ngut ki mynsiem briew ki la duh ei noh, katba kawei pat ka la lait im lyngba ka jingshlur bad jingïarap jong u hepeit Elambok.
Ha ryngkat ka jingshlur, u heprit Elambok u la don ruh ka buit kumno ban pyllait im ïa katei ka khynnah na ka jingngam jyllop ha kaba u la shu ktik ïa ka ba kan pyllait ha ka por ba ka bat skhem bad pynngam ïa u shapoh um.
U Myntri Rangbah haba ai ïa ka syrnod na ki kti jong u ha u heprit Elambok, u la ong, “Kaei kaba phi la leh kam dei ka kam kaba rit namar phi la pyllait im ïa ka mynsiem briew. Ha kato ka khyllipmat kiba bun kin ym don satia ïa ka jingshlur ban leh kumba leh ma phi. Kane ka long kaei-kaei kaba ngi baroh ngi sngewsarong bad na ka liang ki nongshong shnong ka Meghalaya, nga ai ïa phi ïa kane ka syrnod kum ka dak ka jingsngewnguh bad ka jingsngewsarong na ka bynta ka jingshlur ka jong phi.”
Shuh shuh u Sangma u la ong ha u heprit Elambok bad ki bahaïing hasem jong u ba kin pyrkhat kaei kaba ma u kum u Myntri Rangbah un lah ban leh eiei ban ïarap ïa une u heprit ha ka jingim jong u bad ba kin pyntip sha u ïa kita ki jingdonkam.
