Shillong, Jymmang 01
Ka kynhun ïalehkai jong ka Mawsynram Pink Panthers bad ka Mawsynram Cluster ki la rah ïa ka nam lahduh ha ka U-17 Girls Inter Cluster T20 Cricket Tournament 2024 bad (L) Benjamin Diengdoh Memorial U-15 Boys Inter Cluster t20 Cricket Tournament 2024 ba la pynïaid da ka East Khasi Hills Cricket Association.
Ha ka jingïakhun final jong ki kynthei ha ka U-17 Girls Inter Cluster kaba la long ha madan Shortimai Syiem kaba ha Smit, ka Mawsynram Pink Pan-thers ka la lah ban pynliem noh ïa ka Sohra Super Nova da 10 run.
Ka Mawsynram Pink Panthers kaba la kam trai ban tied nyngkong, ka la kamai 72 run bad shah pynhap 10 wiket ha ki 17.4 over. Ka Eliza Lyngdoh ka la ïoh ban tied 17 run na ki 19 bol. Katba ka Libashisha Khonhngaiñ ka la shim 3 wiket ha ki 3 over na ka bynta ka Sohra Super Nova.
Haba wan beh ïa ka thong, ka Sohra Super Nova ka la kamai tang 62 run bad shah pynhap 10 wiket ha ki 13.2 over. Ka Lapynhunlang Khongngaiñ ka la tied 13 run na ki 22 bol. Katba ka Eliza Lyngdoh ka la shim 4 wiket ha ki 3.2 over na ka bynta ka Mawsynram. Ïa ka nam Player of the Match bad Player of the Tournament la khur da ka Eliza Lyngdoh.
Haba phai sha ka jingïakhun final jong ka U-15 Boys Inter Cluster, ka Mawsynram Cluster ka la lah ban pynliem noh ïa ka Sohra Cluster (A) da 86 run. Ka Mawsynram Cluster kaba la shimti ban tied nyngkong ka la kamai 161 run bad shah pynhap 5 wiket ha ki 20 over. U Nangsan Kynter u la ïoh ban khyrwit ïa ka shteng spah kaba 73 run na ki 31 bol. Katba u Bashaikupar Nongdhar u la shim 2 wiket ha ki 3 over na ka bynta ka Sohra.
Haba wan ban beh ïa ka thong ba la buh da ka liang pyrshah, ka Sohra Cluster (A) ka la kamai tang 75 run bad shah pynhap 10 wiket ha ki 12.3 over. U Ryan Emi Swer u la tied 20 run na ki 16 bol. Katba u Nangsan Kynter u la shim 4 wiket ha ki 2.3 over na ka bynta ka Mawsynram. Ïa ka nam Player of the Match bad Player of the Tournament la khur da u Nangsan Kynter.
Ha ka sngi pynhap pyrda la ïadon lang ki bahaïing hasem jong u Bah (L) Benjamin Diengdoh, ha ryngkat ki dkhot ka Mawsynram Sports Association, East Khasi Hills Cricket Association bad kiwei kwei.
