Jowai, Jymmang 01
Ka lympung ïalehkai ‘District Level Inter School Athletic Meet 2024’ ba la pynïaid da ka shlem treikam u District Sports Officer (DSO), West Jaiñtia Hills ryngkat ka jingïatreilang ka West Jaiñtia District Sports Association (WJDSA) ka la sdang ha ka Sngi Balang ha madan Kiang Nangbah Stadium kaba ha Jowai.
Ha kane ka lympung ïalehkai ka ban neh lai sngi lynter la wan shim bynta da 787 ngut ki khynnah shynrang bad kynthei na 25 tylli ki skul kiba don ha kylleng jong kane ka district ha la ki jong kyrdan ïalehkai kiba kynthup naduh ka Under-14, Under-16 bad Under-18.
Ka Additional Superintendent of Police ka West Jaiñtia Hills District ka la long kum ka kongsan ha kaba ka la pynher ïa ka lama kum ka dak ka jingplie ïa ka lympung ha ka jingdonlang u District Sports Officer (DSO) Bah Khroobok Passah, u Working President WJD-SA Bah EMH. Passah, ki principal, ki nonghikai na ki skul bapher bapher, ki waheh shnong. Ïa ka jingbam smai (oath ceremony) la lamkhmat da u Ïoh-i Ksan Lyngdoh.
Ha kane ka sngi sdang la pyndep ïa ki jingïalehkai kynthup naduh ka Shot-Put, High Jump, ka jingïakop mareh ba 800 mitar ha kaba ki khynnah shynrang bad kynthei ki la ïashim bynta shit rhem ban pyni ïa ki sap ïalehkai ba kyrpang jong ki.
Ha ka jingïakop kawang Shot-Put jong ka kyrdan Under-16 Boys la jop da u Thrangki O Lipon na Govt. Boys HS School, ba-ar u Ebormi Pohplet North Liberty HS School bad ba-lai la khur da u Wandame Talang Govt. Boys HS School.
Ha ka jingïakop kawang ShotPut jong ka kyrdan Under-18 ki kynthei la jop da ka Ribathiang Dkhar na ka St. Mary Mazzarello HS School, ba-ar ka Risuk-lang-i Suchiang na ka St. Dominic HS School, bad ïa ka kyrdan balai la khur da ka Jingshaihun Ksoo na ka Little Flower HS School.
Ha ka jingïalehkai Long Jump jong ka kyrdan Under-18 ki shynrang la jop da u Banshankupar Suchiang na ka Sawlyng-doh HS School, ba-ar u Shonghok Dkhar na ka Kiang Nangbah HS School bad ba lai u Deiborshwa Shadap na ka Tome Memorial Secon-dary School, Jowai.
Ha ka Long Jump jong ka kyrdan Under-18 ki kynthei la jop da ka Deigratia Dan na North Liberty HS School, ba ar Lisibia ka Nongtdu na ka St. Mary Mazzarello HS School bad balai ka Emidakashwa Synnah na ka St. Dominic HS School.
Ha ka High Jump jong ka kyrdan Under-16 ki kynthei la jop da ka Tyrchain-i Chyrmang na Don Bosco Sec School, ba ar Hakadayo-i Sana na ka North Liberty HS School bad balai ka Sanika Bhoi na ka Ummulong Presbyterian HS School.
Ha ka jingiakop mareh kaba 800 mitar jong ka kyrdan Under-18 ki kynthei la jop da ka Jestina Dhar na ka St. Mary Mazzarello HS School, ba-ar ka Deiwarimaya-mika Dkhar na ka North Liberty HS School bad balai ka Iwalana Passah na ka Govt. Girls HS School.
Ïa kane ka lympung yn pynkut ha ka sngi Thohdieng. Ki nongjop ha kane ka jingïakop kin shah jied ban mihkhmat ïa kane ka district sha ka State Level ka ban sa long shen mynta u bnai ha ka nongbah Shillong.
