Nongstoiñ, Jymmang 01
Ka jingbym hap u slap mynta la katto-katne bnai, ka la pynlong ïa katto-katne ki shnong ka thaiñ Nongstoiñ ba kin sdang mad ïa ka jingkyrduh ha ka liang ka umbam umdih namar ka jingrang tyrkhong bad ka jingrngat noh jong ki um ki wah.
Ïa kane la ïohi ruh ha ki katto-katne tylli ki shnong kum ha ka shnong Nongsohpian, West Khasi Hills bad kiwei pat bynta ha kaba ki longïing bad nongshong shnong jong kane ka shnong mynta, ki la hap ban leit kit ïa ka um ha ki kali ‘pick-up’ na ki wah tang ban ïoh ïa ka umbam-umdih.
Haba pyntikna ïa kane, na ka liang u Sordar ka shnong Nongsohpian, u Bah Sirian Wahlang u la ïathuh ba katei ka jingtyrkhong um ka la sdang mynta la katto-katne taïew ha kaba ki longïing ki la hap ban leit kit um da ki kali na ki wah.
U Bah Sirian u la ong ruh ba katei ka jingrngat jong ki um ha ki jaka pynlang um ïa kaba ki longïing ki ju pyndonkam man ka por ka la pynlong shisha ka jingeh kaba khraw ïa ki, ha kaba ki la hap ban pynlut ban phah kit ïa ka um ha ki kali.
Shuh shuh u la bynrap ba lada jia ba ka jingbym hap slap kan dang ïai bteng haduh kine ki sngi, ki taïew ki ban wan, ki nongshong shnong kin sa nang ïai mad ïa ka jingeh bad lehse kan sa poi ruh ka por ba kin hap leit thied um.
