Shillong, Jymmang 01
Ha ka miet jong ka 30 tarik u Ïaïong, ki runar ki bym shym la ithuh durkhmat satia ki la leit ban kawang ‘Petrol Bomb’ ha lai tylli ki jaka hapoh ka nongbah Shillong kiba kynthup ïa ka thanat Sadar, ka thanat Rynjah bad ka shlem treikam jong ka Sorkar Jylla kaba la tip kum ka Meghalaya Government Construction Corporation (MGCC) kaba don ha Kenches Trace, Laban.
Haba wad jingtip halor kane ka jingjia, ki nonglum khubor ki la ïoh ban ïakren bad u nongap pahara jong ka shlem treikam MGCC, u la ïathuh ba ha ka miet jong ka 30 tarik u Ïaïong 2024, ki la don ar ngut ki briew kiba la kah durkhmat ïalade kiba la wan da ka ar shaka ha kaba uwei napdeng kine, u la kawang da u ‘Petrol bomb’ ïa katei ka shlem treikam hynrei kaba donbok ka long ba utei u ‘Petrol bomb’ u la hap noh sha madan bad u khlem bthei satia.
Ha katei ka jingjia kam shym la don kano-kano ka jingjia kaba sngewsih hynrei ka la shu don tang ka jingpait ki jingkhang ïit bad kawei na ki kali kaba la shu julor malu-mala na ka jingkawang ïa utei u ‘Petrol Bomb’.
Utei u nongap pahara u la ïathuh ba mar ïa ïohi ïa utei u ‘Petrol Bomb’ uba her nalor suiñ bad leit dei ïa ka jingkhang ïit, u la leit ban beh ïa kitei ki khynnah tangba um lap shuh namar ki la phet noh bak na katei ka jaka.
Katkum ki khubor la ïathuh ba kane ka jingjia shah kawang ‘Petrol Bomb’ ha kine lai tylli ki jaka ha ka miet jong ka 30 tarik u Ïaïong kata ha thanat Sadar ka la jia ha ka por 2:50, ha thanat Rynjah ka la jia ha ka por 2:40 bad ha shlem treikam sorkar kaba la tip kum ka Meghalaya Government Construction Corporation Limited pat ka la jia ha ka por 11:40.
