Tura, Jymmang 01
Katto-katne ngut ki runar ki la leit thang ïa ka shlem (Camp) jong ka kompani shna surok ha West Garo Hills ha ka step jong ka Sngi Balang ha ka por 3 baje mynstep.
Ha kane ka jingjia, ar tylli ki trok Dumper jong ka kompani shna surok, ARSS, ki la julor. Kine ki trok ki dei kiba don ha ka shlem jong ka ARSS hajan Bokmagre kaba long shabar jong ka Tura ha ka surok AMPT. Hynrei ym shym la don kiba mynsaw ha katei ka jingjia.
Mar ïa ïoh jingtip halor katei ka jingjia, ki kali pynlip ding ki la leit sha katei ka jaka ban tem ïa ka ding. Hadien ba la pynlip ïa ka ding, la shem ba ka trok kaba don ïa u nombor ML08 G 9499 ka la julor lut nadong-shadong katba ka trok kaba don ïa u nombor ML08 G 1181 ka la julor malu-mala.
Kham hashwa, ki trok Dumper jong ka kompani ARSS ki la don bynta ha ar tylli ki jingjia ha kaba uwei u briew u la mynsaw jur katba kawei ka khynnah ka la duh noh shiliang ka kjat hadien ba ki la shah tynrah.
Katei ka kompani ka la don naduh u snem 2017 ban shna ïa ka surok Rongram – Tura – Dalu.
Katkum ki tyllong khubor, katei ka jingshah thang jong ar tylli ki trok Dumper ka lah ban dei namar kawei ka jingthoh kaba la saphriang lyngba ki ‘Social Media’ ha kaba la ong ba uwei u briew u la mynsaw ha ka jingshah tynrah ha kawei ka trok Dumper kaba dei jong katei hi ka kompani. Ka jingthoh halor kane ka la saphriang ha ka Sngi Ba-Ar.
Hadien ba la mih katei ka jingthoh, ki pulit ki la leit sha ka ïing sah jong utei u briew bad na ka jingïathuh ka jong u, la sngewthuh ba ka jingmynsaw kam dei satia namar ka jingshah tynrah ha ka trok Dumper.
Ha u kyrwoh khubor ha ka Sngi Balang, u SP ka West Garo Hills, u Dr Dara Aswaghosh, u la ong ba ha kaba ïadei bad katei ka khubor ba saphriang ha ‘Social Media’, la pynpaw ba uwei u briew ïa uba la tip kyrteng kum u Chekam A Sangma u la mynsaw ha ka step Sngi Ba-Ar, ki pulit ki la pynthikna ba u Chekam, 29 snem ka rta, u khlem mynsaw na kata ka jingkynnoh ba u la shah tynrah ha ka trok Dumper.
U SP u la ong ba u Chekam u la hap na ka Scooty ha ka por kumba 2:30 ne 3:00 baje mynstep ha SMELC katba u dang wanphai sha la ïing na kawei ka ïing ïap briew. U la ong ba u Chekam, katba u dang don ha lynti ha kaba u la ñiah da ka Scooty, u la ïohi ïa kawei ka trok Dumper kaba la wan na shadien jong u, bad ha ka jingtieng, u la kum bakla ha ka jingñiah bad u la hap bad mynsaw.
Namarkata, u SP u la ong ba la pynthikna ba u Chekam u khlem shah tynrah ha kata ka trok. U SP u la kyntu ruh ïa ki paidbah ba kin long kiba husiar haba ki ïoh jingtip lyngba ki rynsan ‘Social Media’.
Hynrei wat la ki pulit ka West Garo Hills ki la pyrshang ban pynpaw ïa ki jingshisha halor katei ka jingjia, ki khubor hamsaïa ki la pynbitar ïa ki katto katne ki nongshong shnong. Na ka liang ki seng ba kynthup ïa ka FKJGP, ADE, AYWO, GSU ki la leit ban ïeng hakhmat ka shlem treikam u Deputy Commissioner ha Tura ban pynpaw ïa ka jingbym sngewtynnad halor ki jingjia shah tynrah ha ki trok Dumper bad ki la dawa ba dei ban leh eiei ban teh lakam.
Na ka liang u SP u la pyntip ba kumba ka long mynta, kam don kano-kano ka ban ktah ïa ka shongsuk shongsaiñ, hynrei ki pulit ki peitngor bad la pynbiang ruh ïa ki lad pahara khnang ban pynthikna ba ka jingpyntrei surok jong katei ka kompani kan ïaid beit.
