Shillong, Jymmang:
Ka Meghalaya Human Rights Commission (MHRC) ka la bthah ïa u Director General of Police (DGP) ka Jylla, Dr. L.R. Bishnoi ban aiti ïa ka kaiphod kaba bniah halor ka jingïap jong u Rudra Rabha ha thanat Khanapara, Ri-Bhoi hapoh ka 17 tarik mynta u bnai.
Ka MHRC, Shillong ka la shimkhia hi dalade lyngba ka ka ‘suo moto’ halor ka jingïap u Rudra Rabha ha thanat Khanapara, Ri-Bhoi ha ka 26 tarik mynshem bnai.
“Ka tnad ka la phah shithi ruh sha u DGP ka Jylla ban aiti ïa ka kaiphod kaba bniah halor katei ka bynta katkum ki kyndon jong ka National Human Rights Commission (NHRC) ha lane shuwa ka 17 tarik Jymmang, 2024,” la ong ka kyrwoh na u Superintendent ka MHRC.
Kum ban shu kdew hangne, u Rabha uba la shah kem ha ka 24 tarik Ïaïong, 2024 u la khlad noh ha ka step Sngi Thohdieng (26 tarik Ïaïong) da kaba phasi ïalade hapoh ka along kaba don ha thanat Khanapara ha Ri-Bhoi.
Na ka liang u SP ka Ri-Bhoi, u Jagpal Singh Dhanoa, u la ong ba ha ka 24 tarik Ïaïong ki pulit ki la kem ïa uwei u briew ïa uba la ithuh kum u Rudra Rabha hapoh ki kyndon jong ka aiñ Arms Act bad Indian Penal Code (IPC).
Nalorkata, u Dhanoa u la ong ba ha ka 25 tarik Ïaïong, la rah ïa u Rabha sha ïingbishar bad ka ïingbishar ka la ai lad ïa ki pulit ba kin tohkit ïa u na ka bynta san sngi.
U SP u la ong ba ha ka jingtohkit ki pulit ïa u Rabha, u la ïathuh ba u la buhrieh ïa kawei ka tiar siat ha khlaw bad u la pynpaw ïa ka jingkwah ban ïalam ïa ki pulit sha kata ka jaka. Na ka liang ki pulit, da ka jingïalam lynti jong u Rabha, ki la ïoh ïa kata ka tiar siat na ka khlaw ha Ranibari ha ka jingdonlang ki sakhi.
Hadien ba la dep ïa ki kam ki jam ha ka step 26 tarik, la wanrah ïa u Rabha sha thanat Khanapara ha ka por kumba 1:05 eiei. U SP u la ong ba la hap ban set ïa u Rabha ha thanad Khanapara namar ka Rani Jirang Border Outpost kam don jaka set ïa kiba shah kem.
Hynrei u SP u la ong ba ha ka por 4 baje mynstep, u nongap pahara ha katei ka thanat ha Khanapara u la lap ba u Rabha u la dkhat ïa la ka jingim da kaba phasi ïalade ha along kaba don ha thanat. U SP u la ong ba u Rabha u la sdien ïalade na ki nar kiba don ha along da kaba pyndonkam da ki jaiñ kiba la suba ba u la tar na ka nep ba la ai ha u.
Na ka liang u Executive Magistrate na ka shlem u Deputy Commissioner ka Ri-Bhoi u la leit sha katei ka thanat ban pynlong ïa ka jingpeit bniah ha ka jingdon lang u doktor bad kiwei.
U SP u la ïathuh ba ha kaba ïadei bad katei ka jingjia ki pulit ki la pynrung da ka jingujor ha thanat Nongpoh bad ka jingtohkit ka la sdang.
Ka jingshah kem jong u Rabha ka don ka jingïadei bad ka jingjia ha u bnai Lber mynta u snem ha kaba ki pulit ki la ïoh kem ïa 2 ngut ki khynnah kiba dang 18 snem ka rta hadien ba ki la siat da ka suloi ïa ki pulit ha ka khlaw kaba don ha ka shnong Ranibari.
