Jowai, Jymmang:
Ka District Legal Services Authority (DLSA), West Jaiñtia Hills District hapoh ka National Legal Services Authority ha ka 30 tarik Ïaïong ka la pynlong ïa ka Legal Awareness Programme halor ka phang “Narcotic Drugs and Psychotropic Substance Act, 1985” ha Kiang Nangbah Government College, Multipurpose Hall, Jowai.
Ïa ka jingïalang la pynïaid da ka Kong S. Phyllei, Chief Legal Aid Defense Counsel bad la ïoh ka jingkren pdiang burom na u Dr. J.P. Sharma, Associate Professor, Kiang Nangbah Government College.
Ka thong jong kane ka jingïalang ka long ban pynsngewthuh ïa ki nonghikai bad samla pule halor ka jingma jong u drok bad ruh ban hikai ïa ki samla kumno ban kiar bad ïakhun pyrshah ïa u drok.
Ha kane ka jingïalang la donlang u District and Sessions Judge-cum-Chairman, District Legal Services Authority, West Jaiñtia Hills District, u N. A. Khan, MHJS uba la batai halor ka phang “Narcotic Drugs and Psychotropic Substance Act, 1985” and “Illicit Trafficking of Drugs”.
U la ong ka jingpynlong ña kiba kum kine ki jingïalang kan ïarap bad shemphang ïa ki lad jingtip kiba ïadei bad ka aiñ.
Ki ‘riew shemphang kiba la ai jingbatai ki long u S.I., J. K. Majaw, In-charge, Anti Narcotic Task Force, West Jaiñtia Hills District uba la batai halor ka “Role and Functions of Police Officer under NDPS, Act, 1985”. Katba na ka liang ka Mihmyntdu Comuunity Social Welfare Association TI – IDU, u P. Lamare bad ka Kong N. Challam ki la batai halor ka “Substance Abuse” ne ka jingngop ha u drok.
