Shillong, Jymmang 02
Ka Hynñiewtrep Youths’ Council (HYC) ha ka Sngi Palei ka la ïeng skhem beit halor ka nongrim ba dei ban kyndang bad weng beit ïa baroh kito kiba shong ba sah be-aiñ ha Lum Survey bad pynshai ruh ba ka jingïaleh mukotduma ka dei beit thik tang ïa 3 ngut ki briew ba buh dukan.
Haba kren sha ki lad pathai khubor, u President ka HYC u Bah Roykupar Synrem, u la ong ba ka seng ka la rai ban ai por shitaïew ïa ki bor ka Sorkar Jylla ba kin hiar ban leit jurip ïa katei ka jaka bad ban pynthikna ban kyndang ïa ki ïing ba shna be-aiñ na katei ka jaka.
Nalor nangta, u la ong ka jingshim ïa kane ka rai ka long hadien ba ki bor District ki la pynpaw ïa ka jingbym lah ban leh eiei pyrshah ïa ki nongsah be-aiñ ha katei ka jaka naba kane ka jaka ka don hapdeng ka jingkajia bad ba kane ka kam ka dang don hapdeng ka jingbishar jong ka ïingbishar.
“Halor kane ka jingpynpaw, ngi la leit ban tohkit bad ngi la lap ba ka jingdon mukotduma ka dei thik tang 3 tylli kaba dang sahteng hapoh u District Judge, Shillong haba ïadei bad ka ‘eviction notice’ ba la ai sha 3 ngut ki briew, kiba shong be-aiñ ha ka jaka (kumba 200 haduh 500 sq ft marwei), hapoh ka kyndon 5 jong ka Public Premises (Eviction of Unauthorised Occupants) Act, 1971 bala ai da ka Estate Officer, Guwahati,” la ong u Bah Roykupar.
“Ngi la ïakynduh ruh ïa uwei u briew uba la ïohpdiang ïa ka notice bad uba la ujor mukotduma pyrshah ïa ka eviction notice bad u la kren shai ha ngi ba ka jaka kaba dang ïaid mukotduma ka dei kaba rit bha bad kam don bynta bad ka jaka ba shong ïing beaiñ kiwei pat ki briew,” la ong une u nongïalam HYC bad bynrap ba imat ki bor pynïaid district kim shym la sngewthuh ne shai bha halor kane ka phang.
U la ong ba halor kane, ka HYC ka la rai ban thoh sha u Deputy Commissioner ka East Khasi Hills, Defence Estate Officer, Guwahati bad sha kiwei kiwei ki bor khmih ban ïoh jingshai bad ba kin leh eiei kloi noh pyrshah ïa ki nongshong be-aiñ.
U la ong ba kum ka seng ka kyntu ruh ïa ki bor pynïaid district ba ki dei ban pynlong ïa ka jingleit jurip hi ha jaka na ka bynta ban pynshisha ïa ka jaka ba shna ïing beaiñ ha ryngkat bad ka seng bad ban khot lang ruh ïa ki nongmudui ïa ka mukotduma ba la kdew haneng, hapoh ka shi taïew naduh kane ka sngi, khnang ban lah leh ïa kaba donkam ha kaban kyndang ïa ki nongshong be-aiñ na kane ka jaka.
