Nongstoiñ, Jymmang 02
Ka Hynñiewtrep Youths’ Council (HYC) Mawshynrut Circle ha ka 1 tarik mynta u bnai ka la leit ban jurip lang bad u SDO ka tnat PWD Mawshynrut Division ïa ka surok Mawsyrpad-Thaiem ha West Khasi Hills khnang ban lap da la ki khmat ïa ki jingtrei torti ïa ka surok.
Kane ka jinghiar jurip u SDO ka PWD ka la long ruh hadien ba ka la don ka jingujor na ka HYC ha ka 26 tarik u Ïaïong 2024 halor ka jingtrei torti ïa katei ka surok.
Ka seng hapoh ka jingïalam u President u samla Losbingbel Lyngkhoi la ïathuh ba ha ka jingleit jurip, u SDO ha ryngkat ka seng, u la lap da la ki jong ki khmat ba don ki katto-katne tylli ki jaka kiba trei torti bad kim trei katkum ka DPR.
Shuh shuh ki la ong ruh ba la trei ïa katei ka surok ba 12 kilometer da ki 32 ngut ki kontraktor bad don ki kontraktor kiba siang da ka rong bym pat test da ka ophis bad na ka liang u SDO u la phah sangeh ban trei namar la pyndonkam da ka rong Prominent Sales Corporation (Prominent Bitu-Bind) haduh ba ka tnat ba dei peit kan ïoh ban test shwa ïa ka rong.
La ïathuh ruh ba ki don ki kontraktor ba la dep trei torti bad na ka liang u SDO u la phah trei biang sa shisien.
Haba pynpaw ïa ka jingsngew phylla, ki nongïalam ka HYC ki la ong ba don ki kontraktor ki bym pat sdang siang maw haduh mynta wat lada ka por ka la jan kot 18 bnai.
Shuh shuh ki la ong ruh ba ha kane ka jingjurip, na ka liang u SDO u la pynpaw ba un sa shimkhia bad un sa leh ïa kaba donkam ïa kum kitei ki kontraktor.
Ki la pynpaw ruh ba halor kane ka bynta, ka seng kan ïai buddien nangne shakhmat khnang ba kane ka surok kan neh skhem bad trei bha. Ha kajuh ka por ka HYC ka ai khublei ruh ïa u Executive Engineer ka PWD Mawshynrut Division bad ïa u SDO, kiba la sngap ïa ka jingujor ka seng bad ban shimkhia na ka bynta ka bha ka miat bad ka jingmyntoi ki paidbah ka thaiñ.
