Dong Nai, Jymmang:
Da ki spah hajar tylli ki dohkha ki la shu iap naphang ha ka thaiñ Shathie jong ka nongbah Dong Nai hapoh Vietnam namar ka jingkhluit palat jong ka suiñ bneng bad ha kajuh ruh ka por la ong ba ka dei ka jingbym shim khia jong ka tnat ba dei khmih ia katei ka wah kaba pynlong ia ki dohkha ban iap.
Kumta la ong ba kumba long ha Southeast Asea, ha kaba ia ki skul la hap ban khang khyrdep noh bad kumjuh ruh la hap ban shu pyndonkam antad ia ka bor ding ilektrik, katei ka thaiñ Shathie bad Pdeng jong ka Vietnam ruh ha kine ki sngi ki la hap ban mad ia kajuh ka jingeh namar ka jingkhluit palat jong ka suiñ bneng kaba la ktah jur ia ka pyrthei mariang ha kylleng sawdong jong katei ka nongbah.
Haba iadei bad kane, la ong ba baroh ki dohkha bad jingthaw ba don hapoh um jong ka wah Song May ki la iap lut namar ka jingtyrkhong um bad wat haba ka um ka don ruh hynrei ka la jan rngat lut bad kam lah shuh ban iakhun ia ka jingkhluit jong ka suiñ bneng kat kaba kitei ki jingthaw ba im kin lah ban shah.
La ong ba ki paidbah nongshong shnong katei ka nongbah ki la sngewsih haduh katta namar ba ki hap ban shah satar ia ka jingsma kaba jur kaba wan na katei ka wah naba ki dohkha kiba don baroh ki la iap bad per lut ha sla um ha kine ki shiphew sngi mynta.
Katkum ki tyllong khubor, la ong ba katei ka thaiñ kam shym la ioh slap mynta la da ki katto katne taiew bad kumta katei ka um kaba don ha katei ka wah ka la sdang ban rngat lut khamtam haba ka sngi ka thang bad ka jingkhluit jong ka sngi ka pynlong ia katei ka wah ban rngat bad tyrkhong raw.
