Jowai, Jymmang 02
Ka lympung ïalehkai ‘District Level Inter School Athletic Meet 2024’ ka la jam sha ka sngi kaba ar ha madan Kiang Nangbah Stadium, Jowai.
Ïa kane ka lympung ïalehkai kaba lai sngi lynter, la pynïaid da ka shlem treikam u District Sports Officer, (DSO) West Jaiñtia Hills ha ryngkat ka jingïatreilang ka West Jaiñtia District Sports Association (WJHDS).
Haba phai sha ki jingïakop ba la pyndep mynta ka sngi Palei ki kynthup naduh ki jingmareh 300 mitar, 600 mitar, 800 mitar, 1500 mitar, 2000 mitar, 3000 mitar, kumjuh ki Discuss Throw, Javelin Throw, Shotput, High Jump, Long Jump bad Medley Relay Race.
Katto katne ki resol ki long ha ka jingïakop High Jump jong ka kyrdan Under-14 na ka liang ki shynrang la jop da u Archemi Shylla Gov. Boys HS School, ba-ar u Stickler Phawa (Don Bosco SS) bad balai u Felixson Syrti (Govt. Boys HSS). Katba ha ka liang ki kynthei la jop da ka Peacefully Pohplet (North Liberty HSS), ba-ar ka Parimika Khongngain (North Liberty HSS) bad balai ka Precento-les-de-el Myrchiang (Jaiñtia HSS).
Ha ka jingïakop mareh kaba 300 mitar jong ka kyrdan Under-16 na ka liang ki shynrang la jop da u Erickson Shylla (HK.Singh Memorial SS), ba-ar u Khrawborlang Lyngdoh (North Liberty) bad balai u Pynbiangmiki Dkhar (Jingshai Mihngi Adventist SS). Katba ha ka liang ki kynthei la jop da ka Eladmiki Ksoo (North Liberty), ba-ar ka Daphi Dkhar bad balai Dakini Shylla (Sabahmuswang UP SSA).
Ha ka jingïakop Discuss Throw jong ka kyrdan Under-18 na ka liang ki shynrang la jop da u Victor Mayanglambam na JNV Mukhla School, ba-ar Shemphang Synnah North Liberty HS School bad ba-lai Nickyboy Swer (North Liberty). Katba na ka liang ki kynthei la jop da ka Ribathiang Dkhar (St. Mary Mazzarelo Girls HSS), ba-ar ka Ribanika Saioo (Tome Memorial SS) bad balai ka Jingshaihun Ksoo (Little Flower HSS).
