Shillong, Jymmang 02
Ka jingjyllei ki kam khaïi bad dih drok ha ki jaka paidbah ka la long kaba shyrkhei ha kaba ïa kane la ïohi lyngba ka jingleit hiar kynsan jong ka Hynñiewtrep Youths’ Council (HYC) sengkmie ha ka 2 tarik u Jymmang ban leit khynra hi dalade ïa ki ktem bad ki jaka kiba jyllei bha kiba dih drok kiba kynthup naduh ki thaiñ Motphran, Khlieh Ïew shaduh jaka pynïeng kali kiba don ha Them Ïew Mawlong bad Anjalee.
Ka seng ka la shim ïa kane ka sienjam ban talasi hi ïa ki nongdih drok ka dei hadien ba ka la ïoh shibun tylli ki jingujor na ki paidbah, ki nongshong ïew bad na ki nongñiah kali kiba ïaid manla ka sngi na kitei ki thaiñ bad ki jaka kiba la ud shikatdei eh ïa ka jingdon jong ki nongdie bad ki nongpyndonkam ïa u drok.
Ha kane ka jingtalasi ka seng ka la lap bad sakhi da la ki jong ki khmat ïa ki khynnah ha ka por ba ki dang dung thyrnia drok ha kitei ki jaka. Nalor nangta ka la ïoh ban bat haduh 7 ngut ki khynnah kiba dang leh ïa katei ka kam katba ki la don ruh katto katne kiba la lait phet noh na katei ka jaka.
Hadien ba talasi na ka met jong kitei khynnah, ka seng ka la lap ïa ki thyrnia dung drok kiba shait pyndonkam ban dung ïa u drok.
Ha ka jingtohkit ka seng na kine ki khynnah kiba la shah bat, ki la ïathuh ba kiba bun kiba die ïa u drok ki dei kiba sah hajan ka Ajmera Marbles, Lum Survey kaba dei ka jaka ba ka seng ka dang shu wan jurip dang ha ki katto-katne sngi bad kumjuh ruh napoh Mawprem bad Jhalupara.
“Kane ka long kaei-kaei kaba ima shisha namar ka buh jingma ïa kiba ïaid ba ïeng bad ngi la lap bad sakhi ba wat mynsngi mynshai ruh”, la ong ka seng.
Shuh shuh ka seng ka la ong ruh ba ki don ki nongdie jingdie kiba shong die jingdie hajan ka jaka bret ñiut kaba don Motphran ki la ud la nam shikatdei eh ïa ka jingsakhi jong ki manla ka sngi halor ka jingdon ki nongdie bad ki nongdih ïa u drok ha katei ka jaka.
“Ka jingdon jong katei ka jaka bret ñiut hangtei ha Motphran ka long shisha kaei-kaei kaba buh jingma bad kaba isaitmait met namar ka buh jingma ha kawei ka rukom, kine kiba pyndonkam ban dung ïa u thyrñia injek ki rieh ha kato ka kyndong jong ka kali bret ñiut”, la ong ka seng.
Na ka liang ka seng ka la buh por ruh hapoh 2 sngi ïa ki bor jong ka Shillong Municipal Board (SMB) ba ka dei ban weng mardor ïa katei ka jaka bret ñiut bad lada ka donkam ban buh ïa kitei ki ñiut ha katei ka jaka ka dei ban phah wan da ki kali kit ñiut ha ka por mynstep lane janmiet bad lada ka Municipal kam leh kumta, ka seng kan sa leit ban tan hi noh ïa katei ka kali bret ñiut kaba don ha katei ka jaka.
Ka seng ka la shim lut ïa ki kyrteng jong kitei ki khynnah nongdih drok bad kumjuh ïa ki nongdie drok bad ka la buh ka jingmana ruh ba nangne shakhmat lada ka seng ka dang lap ïa kum kine ki khynnah kiba dih drok khamtam ha ki lynti syngkien kan ai jingsneng kaba tyngeh ïa kitei ki khynnah.
“Na ka liang ka seng ngi la dep ban maham tyngeh ïa kine kiba pyndonkam ïa une u jait jingdih bad na ka liang ka seng ngin sa shim ïa kawei pat ka sienjam ha kaba ngin sa nang leit sa sha kiwei pat ki jaka ba ngin leit ban ïaleh katba lah ban rat dyngkhong ïa kine”, la ong ka seng.
Ka seng ka la ong ruh ba kane ka jingjyllei ki nongdie bad ki nongdih drok ha kine ki jaka kaba la ïalam ruh shaduh u pud ban shah lute ki paidbah ka dei namar ka jingbym shimkhia jong ka tnad pulit ban leh eiei halor kane ka bynta bad kaba la pynlong ruh pat ïa ka seng ba kan hap mih hi dalade sha madan.
