Imphal, Jymmang:
U Myntri Rangbah jong ka Manipur u N. Biren Singh u la ong ba ka jingwan rung beaiñ jong ki ‘riew phet wir na Myanmar ka la long ka daw na ka jingmih shuh shuh sa kumba 996 tylli ki shnong bathymmai ha ka jylla ha kine ki 18 snem ba la leit.
Ha kiba bun kyrwoh khubor ba la buh ha ki rynsan lad pathai, u Myntri Rangbah u la ong ba ka la don ka jingkiew jong ki shnong ki bathymmai tad haduh mynta ïa kaba la sdang naduh u snem 2006 bad ka jingwan rung kyrthep jong ki briew na Myanmar ka la long ka jingbuh jingma ïa ki trai shnong bad kumjuh ïa ka jingshngaiñ jong ka ri.
U Singh u la ong ruh ba kane ka jingwan rung beaiñ jong kine ki riewphet wir ka la long na ka daw ki lad kamai, ka jingwad kam, ka jingwad jaka bad halor ka jingtreikam ki hok na ka bynta ki trai shnong.
