Bertina Lyngdoh
Ka jingtim ka long kawei kum ka jingshah pynshitom kaba man u briew um sngewtynnad ban mad ïa ka. Ka jingtim ka wan dei namar ka jingleh jongngi hi, ka jingleh shaba palat pud. Kam long shuh kaei kaei kaba thymmai ïa baroh haba ïa dei bad ka jingshah tim. Kum ka nuksa, lada ngi la leh bakla ne leh ka bym bha, ngi ju shah tim na ïing na sem, na ki kmie ki kpa, ki paralok, u lok ka lok, bad kumta ter ter. Kum kine, ki dei kita ki jingshah tim ki bym neh slem bad ba ki long ka jingpynkyndit ruh ka jinghikai ïa ngi. Kaei pat kata ka jingtim kaba pynsaja lada ngi la bakla to ngin ïa sngewthuh.
U briew u im ban kamai, ban sngewbha, ban sngewsih, ban kyrmen, ban ngeit, ban hikai bad bad ban shah hikai. Namarkata, ban im ha kine baroh, kam long kaba suk. Ynda u briew u poi ha ka rta ba la rangbah, ne wat ha ka jinglongkmie jinglongkpa, ban shu im tang kat ban im ym im shuh. Ngi donkam ïa ka kam ka jam, hynrei ban ïoh ïa ka ban pyndap ïa ki jingdonkam, long kaba shitom bha. Ka jingkyrduh kam kam dei tang ïa kiba la don ka kyrdan pule hynrei wat ïa ki bym don ruh. Namarkata, bun ki ju shim ïa ka rai ka bym bha naba ki mut kan pynsuk ïa ki ha ka ban pynmih pisa. Kata keiñ ka dei ka jingthoh tim ne khalai nusip. Sdang te sdang da ka barit tyngka shuwa, ynda ki la ïoh kham bun ban ïa kaba ki siew ki sa sdang ban pynheh ïa ka tyngka khalai da kaba ki mut ba mynta ka kynti lei kin nang ïoh bun. Ym tang ba ki siew pynheh ïa ka tyngka, hynrei kaba sngewsih ka long ba kat nang mih ki sngi ki la nang shah khring bad ba ki la kyrni ban lehkai ïaka. Kaba kham sngewsih ruh ka long ba don kiba ju lehkai ïa kum kane ka kam ha ka kyrteng jong kiwei pat. Te kumta, kumne shi kumne, ki ïai lehkai ynda suki-suki pat, kim ïoh nong shuh hangta keiñ kalong ka jingtim kylla ïa ki. Un poi lei u pud ba ka pla ka la jyndong, bad ba hap ban bynda noh da ki jingdon jingem la jong. Kane keiñ ka long kaei kaei kaba ktah ïa ka shongshngaiñ ka ïing ka sem kumjuh ruh ïaka longrynïeng shimet.
Kumta, to ngin hun ïa kat kaba mih nala ka umsyep ban ïa kaba ngi shah tim ha ka jingthoh tim. Haba dalade hi ngi la ngop ïa ki kam sniew, ïa kaba ngi la tip lypa, Wat na u Blei ruh kam don ka jingisynnei. Lada ngi kamai hok hi, wat lada ka jingïoh ka long ka barit ruh, ka burom pat ngi don. Nalor kane, kiwei ruh ki long kiba la kloi ban ïarap lada ngi hi ngi im bha. To ngin wad wat lada ka long i kamai i barit, ia kaba ngin shah tim ha kum kane ka jait khalai.
