Nongstoiñ, Jymmang 02
Da ka jingsngewkhia na ka bynta ki nongrep ki nongri jingri jong ka thaiñ West bad Eastern Khasi Hills, ka FKJGP West Khasi Hills lyngba ka Agriculture Cell ha ka Sngi Palei ka la pynlong ïa ka jingïalang ïamir jingmut hapdeng ki nongrep bad nongri jingri ka thaiñ bad ki riewshemphang lane ki ophisar na ki tnat sorkar ba kynthup ïa ka Agriculture, Horticulture, Dairy, Animal Husbandry and Veterinary, ka Nongstoiñ C&RD Block bad kiwei kiwei.
Ka jingthmu jong kane ka jingïalang ka long ban plie lad ïa ki nongrep bad nongri jingri ka thaiñ ba kin ïoh ïakren markhmat bad ki ophisar ki tnat sorkar bad ruh ban buh jingkylli bad pan jingshai halor ka jingeh kaba ki ïakynduh kum ki nongrep bad ki nongri jingri.
Ha katei ka jingïalang, ki nongrep na kitei ar tylli ki District, kumba khyndai phew ngut ki la ïashimbynta lang bad ha ka jingïatai ban ïamir jingmut ki nongrep ki la pynpaw ïa la ki jingeh kaba ki ju ïakynduh na ka por sha ka por khamtam eh haba ïadei bad ka jingshah bam khñiang ki jingthung kumjuh ruh ka jingpang ki jingri.
Ha katei ka sngi, ka FKJGP kum ka dak ban ai mynsiem bad burom ïa ki nongrep jong ka thaiñ, ka la ïoh ruh ban sam ïa ki khusnam sha kiba la kham paw ha ka kam kum kiba trei shitom na ka bynta ban kyntiew ïa ka kam rep bad ri jingri hapoh ka dong bad ka thaiñ.
Ïa ka jingïalang la pynlong ha Bishop hall Nongstoiñ, ha kaba u Bah Garod LSN Dykes, Deputy Comissioner ka West Khasi Hills District u la long kum u kongsan, ha ka jingdonlang u Bah Dundee Cliff Khongsit, President FKJGP Sengkmie kum u symbud kongsan, ki ophisar sorkar na kitei ki tnat treikam ka Sorkar, Bah Chandra Nongdhar President ka FKJGP West Khasi Hills District bad kiwei kiwei.
U Deputy Commissioner (DC) haba kren kum u kongsan ha ka jingïalang u la ong, ha kane ka juk kaba mynta la donkam ba ki kmie ki kpa kin hikai ruh ïa ki khun ba kin ieid ïa ka kam rep nalor ka pule puthi jong ki ha ki skul khnang ba kin nang ban pyndonkam ynda kila dep ïa ki jingpule bad u la ong ruh ba ka kam rep ka dei ban hiar pateng namar khlem ki nongrep kumno u briew un im.
U Bah Shngainborlin Nongsiej, Junior Rural Development Officer, Nongstoin C&RD Block, Nongstoiñ haba ai jingkren ha ka jingïalang u la ong ba ka Jylla katba nang mih ki sngi bad ki por ka dang hiar ha ka kam rep kam riang katba u nongbam pat u nangbun nangbun da kaba u la kdew ruh ba ïa kiba bun hi ki mar ba dei ban bam, ka Jylla ka dang shaniah bad hap shu thied na shabar ka Jylla.
U la ong ruh ba ki briew hapoh ka Jylla Meghalaya ki dang kheiñ sting bha ïa ka kam rep kam riang namar kiba bun ki jaka ki shu ieh shrah kai khlem da pyndonkam katba ha kiwei pat ki Jylla lada i jaka i lait tang khyndiat ruh kim ju pynsepei ban rep ban riang.
U Bah Bristar Mawthoh na ka Agricultural Cell ka FKJGP Sengkmie u la pynkynmaw ba ki nongrep ki dei kiba pynim bad bsa ïa kiba bun bah ki longïing bad nongshong shnong bad ka bank jong ki nongrep ka dei ka kper, ka khyndew ka lum bad ka pynthor kumta ki nongrep ki dei ban shim ïa ka kam rep kum ka kam ym ban shu khmih lynti tang ïa ki kam ba ïoh tulop.
U la kyntu ruh ïa ki ophisar na ki tnat sorkar khamtam ki tnat ba dei peit ha ka kam rep kam riang ba ki dei ban da jied bad peit thuh bha haba ki ai jingïarap ïa ki nongrep namar ki nongrep bad nongri jingri ki don ar jait kata ki nongrep ophis kiba shu lap miet tang ha ophis sorkar ban wad skhim bad ki nongrep kiba shisha.
