Shillong, Jymmang 02
Ka Hynñiewtrep Youths’ Council (HYC) ha ka Sngi Palei ka la pynpaw ïa ka jingsngew thamula ba u Symbud Myntri Rangbah ka jylla u Bah Prestone Tynsong un phah pynshisha ïa ka jubab RTI kaba la ïoh da ka seng na ka Shillong Municipal Board (SMB).
Haba kren sha ki lad pathai khubor, u President ka HYC u Bah Roykupar Synrem u la ong, ka seng ka buh jingkylli ïa ka rai ka Sorkar Jylla ban pan jingshai haba ïadei bad 342 tylli ki longïing ka Them Metor na ka Shillong Municipal Board (SMB) kaba ai jubab ïa ki jingtip ba la pan lyngba ka RTI Act, 2005.
Lah ban pynpaw ba katkum ka RTI ba la ïoh da ka HYC, ka SMB ka la pyntip na ki 342 tylli ki longïing ha Them Metor, tang 194 tylli ki dei ki longïing jong ki briew ba trei ha ki tnat Sorkar katba 148 tylli ki dei kiba shu shong beaiñ.
Une u nongïalam ka HYC u la ong, ka jingkren u Bah Prestone ban pynpaw ba u la phah ïa ka jubab RTI ba la ïoh da ka seng sha ka tnat Urban Affairs bad SMB ban pynshisha ka long shisha kaba thamula.
U Bah Roykupar u la ong, “Kumno un phah ïa ka dorkhas jong ngi sha kajuh ka tnat kaba ai jubab ïa ka RTI jong ngi. Kumno kan mih ka jingkylla? Hato kin pynkylla noh ïa ki jingkheiñ? Hato kin pynkylla noh ïa ki jingshisha mynta? Ngi ïeng skhem bad ka jingdawa jong ngi bad ngin sa ïapeit ïa kaei ka jingpynshai ban sa ai da ka SMB”.
U la ong ba ka Sorkar kan sa pynlong ïa ka jingïalang bad ka Harijan Panchayat Committee (HPC) ha ka 7 tarik Jymmang. “Hynrei, ngi ïeng skhem ba ngim don ban ong eiei lada ka Sorkar ka ai quarter sha ki nongtrei Sorkar hynrei kam dei ban ai ïa kano kano ka jingmyntoi sha kino kino ki longïing ki bym dei ki shakri ka Sorkar,” u la ong.
Ka HYC ka la dawa ruh ïa ka Sorkar ban kyndang beit ïa ki 148 tylli ki longïing ba la shu sah beaiñ ha Them Metor, katkum ka jinglap na ka RTI ba la ïoh na ka SMB.
Shuh shuh na ka liang jong ka HYC ka la byrngem ruh ba kan sa leh ïa kaei kaba donkam lada ka Sorkar ka dang ïai bteng ban pynslem haba ïadei bad kane ka kam.
