Jerusalem, Jymmang:
U Secretary of State jong ka US- u Antony Blinken ha ka jing-iakren bad u Myntri Rangbahduh ka Israel- u Benjamin Netanyahu ha ka Sngi Balang, u la ong ba ka United States kam shym la sngew iahap ne kyrshan ia ka jingleit hiar thma jong ka Israel sha ka nongbah Rafah hapoh Gaza hynrei ka jingiadei kam bad jingkyrshan jong ka US ka long namar ka jingshah thombor jong ka Israel ha ka kynhun lehnoh Hamas. Hynrei u la ong pat ba ka Israel kam dei ban leh bym kheiñ snep ia ki mynsiem briew kiba don hapoh Gaza bad kiba long tang ki riew paidbah ba lui-lui bad ka Israel ka hap ban pyrkhat bad ban sangeh noh ruh ia katei ka jing-leh be-aiñ jong ka lada ka kwah ban pyllait ia ka pyrthei na ki jingma kiba ap.
Namar u Blinken u la ong ba ka United States ka dap da ka jingsngewkhia halor ka jingduh ei ia ki mynsiem briew ba lui-lui kiba long tang ki nongshong shnong jong ka nongbah Gaza hynrei ki bym don dak shun eiei bad ka Israel. Pynban la ong ba ka Israel kam shym la pyrkhat na bynta jongki hynrei ka pyrkhat tang ia kito ki paidbah jongka kiba shah rahbor ha kitei ki lehnoh Hamas bad dei na kane ka daw ba ka Israel kam shym la sangeh ia ka jingleit hiar thma sha Gaza katba ka Hamas kam pat pyllait ia kitei ki briew jongka.
La ong ba ha kane ka sien leit jurip kaba 7 jong u Blinken sha Middle East, u la ioh ban iakynduh bad u Netanyahu kumba 2 kynta shiteng ban iakren halor kitei ki kam ki jam kiba sah baroh bad hadien kata pat u la ioh ban iakynduh bad kiwei de ki heh na ki tnat bapher ban iapynbeit ia ki kam ki jam kiba iadei bad ka nongbah Gaza.
Ha kajuh ka por ruh la ong ba utei u nongialam ka US u la pyrshang katba lah ban leit iakren na ka por sha ka por bad ban wanrah ia ka jingiasuk hapdeng ka kynhun lehnoh Hamas bad ka Israel namar ka US ka la iohi ia ki jingma kiba khraw kiba ap ia ka pyrthei baroh kawei lada ym lah ban tehlakam noh ia ka thma Israel ha ka por kaba biang, ha kaba ka Israel kam shym la iashrut ne ioh daw tang ia ka kynhun lehnoh Hamas jong ka Palestine, hynrei ka la poi iakynad bad pyni bor ruh sa bad kiwei de ki kynhun lehnoh jong kiwei pat ki ri kum ka Hezbollah na Lebanon bad kumjuh ruh wat bad ka Iran.
U Blinken u la ong ruh ba ka shong sa tang ha ka rai jong ka Israel ha kane ka por, namar na ka liang ka kynhun lehnoh Hamas kaba synshar hi ia ka nongbah Gaza, ka la long kaba kloi ban sangeh noh ia ka jingiakynad bad ka Israel kumba la ioh ban iakren bad ki heh na Qatar bad kumjuh ruh ka Egypt.
Shuh shuh ruh u Antony Blinken u la iathuh ba naduh ba ka Israel ka la mynjur ban ailad ia ka jing pynpoi ia ki lad jingiarap sha ki paid nongshong shnong ka Gaza lyngba ki bynta khappud jongka, katei ka kam sam jingiarap sha ki paidbah nong Palestine kiba don hapoh ka nongbah Gaza ka la iaid shaid- shaid bad la nang ioh ban leh ia ki kam kiba shu sahkut baroh shi katta namar ka jingleit hiar thma ba khlem sangeh jong ka Israel baroh shi katta.
Watla katta, u Blinken u la ong ba tang katta kam pat biang namar kumba la iohi hi ba ka jingïap jong ki briew hapoh Gaza ka la jur palat bad kumta ka Israel ruh ka donkam ban leh eiei ban tehlakam ia ka jingduh ei ia ki mynsiem briew ba lui-lui ha katei ka nongbah. Namar lada ka Israel kan pyrkhat bha ia kane, ha kajuh ka por ruh kan iarap ban pyllait ia ka pyrthei baroh kawei na ki jingma kiba khraw kiba ap ia ki ri bapher jong ka pyrthei kiba la kylla iashrut bad iakynad tang namar jong ka thma hapdeng ka Israel bad ki lehnoh Hamas jong ka Palestine.
