Shillong, Jymmang 02
Ki ophisar ka tnat Custom ha ka Lah Sngi U Blei jong ka taïew ki la ïoh ban kem noh ïa ar ngut ki briew bad na kine la ïoh ruh ban kurup ïa ki kuli dawai drok ba la tip kum u Methamphetamine (WY) ba shongdor haduh T. 2.23 klur.
Kane ka jingïoh kem bad kurup ïa kitei ki dawai kuli ka la long hadien ïa ka jingtip kaba bniah, ha kaba ki ophisar ka Preventive Custom, NER, Shillong, ki la hiar mar-mar sha ka bynta jong ka surok Silchar-Jiribam ha ka 29 tarik mynshem bnai bad ban peitngor katto-katne kynta ïa ki briew ba kit drok.
Hadien ka jingap bad peitngor, ki ophisar ki la ïoh ban bat noh ïa ar ngut na ka thaiñ Kashipur jong ka surok Silchar-Jiribam bad ban ïoh kurup ïa u kuli Methamphetamine uba khia haduh 2.270 kilo na ka met kine ki briew.
Ïa kine ki briew la kem bad pynngat ha ki kyndon jong ka NDPS Act, 1985 bad la phah ïa ki sha ka Judicial Custody. Ka jingtohkit ïa kane ka kam ka dang ïaid shaid shaid.
Na ka liang ka tnat Custom ka la pyntip ba ka long kaba la khreh ban ïakhun ïa kino-kino ki kam runar ba kynthup ïa ka jingkhaïi tuh ïa ka ksiar, sikret, drok, kiwei ki jingdih buaid, ki pisa thok bad kiwei kiwei.
La ong ruh ba mano-mano ki lah ban kyrshan ïa ka jingïaleh pyrshah ïa ki kam runar ba ju jia ha ki khappud da kaba ai jingpyntip sha ka tnat Custom katba ïa ka kyrteng jong ki nongai jingtip yn buhrieh bad ba kan don ruh ka skhim khusnam kaba biang bha.
