Shillong, Jymmang 02
Ka jingtei ïa ka jaka ri mrad kaba thymmai ha Umtrew Ri Bhoi district ka la jan dep artad bad ïa kane la pyntip da ki ophisar ka tnat khlaw ha ka jingïalang bad u Myntri Rangbah u Conrad K Sangma ha ka Sngi Palei.
U Myntri Rangbah u la lum ïa ka jingïalang na ka bynta ban sngewthuh haduh katno ka kam ka la ïaid haba tei ïa kane ka jaka ri mrad kaba la sahteng mynta la bun phew snem naduh mynshwa. Kumta kane ka Sorkar ka la shimkhia ban sdang pyntrei bad ban pyndep ïa kane ka jaka ri mrad kaba don ha ka jaka kaba heh kumba 72 hectare.
Na ka liang ki ophisar ki la batai ïa kiba bun ki sienjam kiba la shim kum ka jingpynbiang ïa ki jingdonkam ki paidbah kiba leit jngoh ïa kane ka jaka ri mrad kynthup ruh ïa ki khynnah.
U Myntri Rangbah u la ong ba kane ka jaka ri mrad (Zoo) ka dei ban long ruh ka jaka kaba khring ïa ki nongjngohkai pyrthei khamtam kito kiba sngewtynnad bad kwah ban kham tip bniah shaphang ka jingriewspah ha ka liang ki dieng ki siej bad ki jingthung jingtep ka ban long ruh ka jaka pdeng ban pule bad kham ïoh jingtip shuh shuh ha kiba bun ki bynta.
U Myntri Rangbah u la ai jingmut ruh ïa ki ophisar, ba haba ki peit ïa ki kam ki dei ban peit lang ruh ïa kane ka jaka ri mrad ba kan long kaba pynïaid da kiba la tip bha ïa ka kam (professionals) bad kiba lah ruh ban pynïaid naduh ka jingdie tiket, jaka ïeng kali, jaka bam bad kiwei kiwei ki jingmyntoi kiba lah ban kham khring shuh shuh ïa ki nongwankai.
