Shillong, Jymmang 02
U President ka Hynñiewtrep Achik National Movement (HANM) Sengkmie u la pynthikna ba ka seng kan nang bteng ban leit ïakhih sha nongbah Delhi ban ïoh jingithuh noh ïa ka ktien Khasi wat lada ki nongkitkam kiba hakhmat ki la mih noh.
U la ïathuh ba ka seng ka la rai ba lada ki leit ban ïakhih sha Delhi kin nym leit shuh palat 50 ngut namar ka ktah ïa ka jinglut.
Ha kawei ka liang u la pynpaw ka jingsngewkmen ruh ba kawei ka sengbhalang ka UHM ka la wan ban pynthikna ban ai jingkyrshan lada ka HANM kan leit ïakhih biang sha Delhi.
“Ngi la rai ban leit ïakhun haduh ban da seisoh ïa ka jingïakhih dawa ktien Khasi, ILP bad pynbeit ïa u pud u sam bad ka jylla Assam” u la ong.
U Bah Lamphrang u la pyntip ba ha jaka jong u Bah Kyllang Thongni kum u General Secretary uba la mih noh la thung bujli da u Bah Beforestar Rynjah uba dei u President ka Nongthymmai Circle bad ha jaka u Bah Nelson Kharbani uba dei u Vice-President la thung ïa u Bah Alex Nongbet uba dei u Secretary ka HANM Upper Shillong.
Halor ka jingmih ki jingshah kynnoh ha ki rynsan social media, u Bah Lamphrang u la pynshai ba ka seng HANM kam don bynta bad kano-kano ka seng saiñpyrthei ne bad ka NPP.
U la ong ba ïa ka HANM la seng da ma u bad u Bah Anderson Syiemlieh (bam kwai ha dwar u blei) ha u snem 2008 katba ka NPP ka mih hadien. Kumta ban kynnoh khlem da tip ïa ka tynrai ka long kumba pynjah burom.
Haba ïadei bad ka jingmih noh ki nongkitkam ka HANM Mawthadraishan Circle hapoh jingïalam u Bah Lambornes Basaïawmoit kum u President bad Bah Banshemphang Diengdoh kum u Secretary.
Kine ki nongïalam ka HANM Mawthadraishan Circle ki la aidaw ba ki mih noh namar ka kynrum-kynram hapoh ka seng ha kine ki sngi.
Katba u Bah Lamphrang u la ong ba ki dkhot ki dang don bad ka HANM ha Mawthadraishan Circle, bad ha kine ki sngi ki nongïalam ka District kin sa leit ban pynskhem noh ïa ki nongkitkam bathymmai.
