Nongpoh, Jymmang 02
Ki nongïalam jong ka Dorbar Raid Nongpoh ha ryngkat bad ka Dorbar Shnong Nongpoh da ka jingsngewkhia jur ki la pynpaw paidbah halor ka jingleh donbor jong ka Nongpoh Town Committee (NTC) ban pyntrei ïa ka skhim Inter-Locking Concrete Block Pavement ha ka jaka jong ka Raid kaba hap lang ruh hapoh ka jingpeit jingkhmih jong ka Dorbar Shnong Nongpoh kaba don hakhmat jong ka Nongpoh Town Shopping Complex ha Nongpoh.
Haba kren sha ki lad pathai khubor ha ka Sngi Palei ha Nongpoh, u Bah Linus Lyngdoh uba dei u Lyngdoh ka Raid Nongpoh, ha ka jingïadon ryngkat u Rangbah Shnong ka shnong Nongpoh, u Bah Silvester Mynsong bad baroh ki dkhot jong ka Dorbar Raid Nongpoh, u la ong ba ka Nongpoh Town Committee ka la leh donbor da kaba pynpra ïa ki jingtei jong ka Raid bad pyntreikam jubor ruh ïa katei ka skhim ha ka jaka jong ka Raid Nongpoh khlem ka jingïoh bor ne ïoh jingbit na ka Dorbar Raid Nongpoh bad ka Dorbar Shnong Nongpoh.
U Bah Linus u la pyntip ruh hadien ka jingujor jong ki nongïalam ka Dorbar Raid Nongpoh bad ka Dorbar Shnong Nongpoh, ki bor pynïaid District ka Ri Bhoi ki la bthah ïa ka Nongpoh Town Committee ban pynsangeh shwa ïa ka jingpyntreikam ïa katei skhim ha u snem 2022, hynrei na ka liang ka Nongpoh Town Committee ka khlem pynsngap satia bad pyntreikam beit ïa katei ka kam.
U la pynkynmaw ruh ba katei jaka ha kaba la tei ïa ka Nongpoh Town Shopping Complex ka dei kaba la ai sngewbha da ka Dorbar Raid Nongpoh bad ka bynta kaba shakhmat bad kaba don marjan bad ka surok bah National Highway-6 ka dang dei hi kaba la long trai da ka Dorbar Raid Nongpoh da kaba pyntip ruh ba ha u snem 2014, ka Dorbar Raid Nongpoh ka la aiti ïa katei ka jaka lyngba ka jingsoi soskular kaba ar snem sha ka Dorbar Shnong Nongpoh bad ka Nongpoh Town Committee na ka bynta ban wanrah ïa ki kam pynroi ban pynitynnad ïa katei ka jaka.
U la ïathuh ruh ba ha u snem 2016, kata hadien ba ka Dorbar Raid Nongpoh ka la ïohi ba ka Nongpoh Town Committee kam shym la leh eiei bad ruh kaba dei artat ka jingkut jong ka jingsoi soskular, ka la shimti biang ïa katei ka jaka bad ha u snem 2022, ka Dorbar Raid Nongpoh ka la tei da ki dukan ha katei ka jaka. Hadien ka jingïoh ïa katei ka skhim, ka Nongpoh Town Committee ka la pyrshang ban pyntrei ïa ka kam bad ban pynpra ruh ïa ki dukan ba la tei da ka Dorbar Raid Nongpoh khlem da kynjoh ktien ne pan jingbit satia. Kumta na ka liang ki nongïalam jong ka Dorbar Raid Nongpoh lem bad ka Dorbar Shnong Nongpoh ki la leit ban ujor sha ki bor pynïaid District ka Ri Bhoi, ha kaba la bthah ïa ka Nongpoh Town Committee ba ka dei ban pynsangeh shwa, hynrei kam sngap satia ïa katei ka jingbthah jong ki bor pynïaid District.
U la pyntip ba ha ka 30 tarik u bnai Ïaïong, 2024, ka la don ruh ka jingïalang hapdeng ki nongïalam ka Dorbar Raid Nongpoh, ka Dorbar Shnong Nongpoh lem bad ka Nongpoh Town Committee ha ophis treikam jong u Raja Brahma, Additional Deputy Commissioner ka Ri Bhoi, ha kaba la bthah ïa ka Nongpoh Town Committee ba ka dei ban phah ïa ka shithi panmap sha ka Dorbar Raid Nongpoh bad ka Dorbar Shnong Nongpoh halor katei ka jingleh donbor ka jong ka bad ruh ba ka dei ban siew ïa ka bailutksan halor ka jingpynpra dusmon ïa ki jingtei jong ka Raid.
Hynrei tang shisngi hadien katei ka jingïakren, kata ha ka 1 tarik u bnai Jymmang, ka Nongpoh Town Committee ka la pynmih pat ïa ka shithi khot sngewbha (invitation letter) ban plie paidbah noh ïa katei ka skhim Inter-Locking Concrete Block Pavement, kaba la pynkyndit bad pynsngewlyngngoh ïa ki nongïalam ka Dorbar Raid Nongpoh bad ruh ïa ki nongïalam ka Dorbar Shnong Nongpoh kaba ki la kynnoh ruh ba ki nongïalam ka Nongpoh Town Committee kim don satia ka jingburom markylliang bad la shu leh donbor.
Halor katei ka jingleh donbor da ka Nongpoh Town Committee, ka Dorbar Raid Nongpoh lem bad ka Dorbar Shnong Nongpoh ki buh ka jingkyntu sha ki bor pynïaid District ka Ri Bhoi bad ruh ïa ka tnat treikam ba dei khmih jong ka sorkar ba ki dei ban pynsangeh mardor ïa katei ka jingthmu ban plie paidbah ïa katei ka skhim lashai ka sngi, kata ka 3 tarik u Jymmang 2024 katba ym pat lah ban ïa pynbeit ha ka rukom kaba biang hapdeng ka Dorbar Raid Nongpoh, ka Dorbar Shnong Nongpoh bad ka Nongpoh Town Committee. Kumta lada na ka liang ki bor pynïaid District bad ka tnat ba dei khmih jong ka sorkar kim leh eiei, na ka liang ka jong ki kim banse ban shim da kiwei pat ki sienjam ban pynsangeh ïa ka jingplie paidbah ïa katei ka skhim.
